16:02, 17 - اقپان 2021 | GMT +5
الماتى اكىمى جۇمىرتقا باعاسىنىڭ وسۋىنە قاتىستى پىكىر ءبىلدىردى
الماتى. قازاقپارات- الماتى اكىمى باقىتجان ساعىنتايەۆ تۇرعىندارعا ەسەپ بەرۋ كەزدەسۋىندە قالادا ازىق- تۇلىك باعاسىنىڭ ءوسۋ ماسەلەسىنە قاتىستى تۇسىنىك بەردى، دەپ حابارلايدى قازاقپارات ءتىلشىسى.
«قازىر جۇمىرتقا باعاسى الماتىدا عانا ەمەس، بۇكىل قازاقستان بويىنشا وسكەن. بۇنى سالا ماماندارى ماۋسىمدىق ءوسىم دەپ وتىر. بۇگىنگى جاڭالىقتاردا رەسەيدە دە وسىنداي ماسەلە بولىپ جاتقانى ايتىلدى. بۇل جاعداي الداعى ۋاقىتتا تۇراقتالادى دەپ ويلايمىن»، - دەدى اكىم.
سونىمەن قاتار ول قالاداعى ازىق- تۇلىك باعاسىن تۇراقتاندىرۋ بويىنشا قانداي جۇمىستار اتقارىلىپ جاتقانىن تىلگە تيەك ەتتى.
«بىلتىر بيۋدجەتتەن 7 ميلليارد تەڭگەدەن استام قاراجات ءبولىپ، الەۋمەتتىك ماڭىزى بار تاۋارلاردىڭ قورىن جاسادىق. ول كەزدە 18 ءتىزىم بويىنشا باعانى ۇستاپ قالدىق. بۇل - باعا ءوسىمى بويىنشا ەلدەگى ەڭ تومەنگى كورسەتكىش بولدى. مۇنى قولعا الماساق، باعا ودان ارى شارىقتاپ كەتەر ەدى»، - دەيدى باقىتجان ساعىنتايەۆ.
اۆتور: الما مۇقانوۆا
