پرەزيدەنت نۇرتىلەۋ يمانعالي ۇلىنىڭ دۇنيەدەن وتۋىنە بايلانىستى كوڭىل ايتتى

نۇر-سۇلتان. قازاقپارات - مەملەكەت باسشىسى بەلگىلى تەلەجۋرناليست نۇرتىلەۋ يمانعالي ۇلىنىڭ دۇنيەدەن وتۋىنە بايلانىستى كوڭىل ايتتى، دەپ حابارلايدى قازاقپارات.

«قازاقستان پرەزيدەنتى قاسىم-جومارت توقايەۆ تانىمال جۋرناليست، قازاق تەلەۆيزياسىنىڭ ارداگەرى نۇرتىلەۋ يمانعالي ۇلىنىڭ وتباسى مەن جاقىن تۋىستارىنا كوڭىل ايتۋ جەدەلحاتىن جولدادى»، دەپ جازدى پرەزيدەنتتىڭ باسپا ءسوز حاتشىسى بەرىك ءۋالي Facebook-تەگى پاراقشاسىندا.

«نۇرتىلەۋ يمانعالي ۇلى تەلەۆيزيا سالاسىندا ءوزىنىڭ قولتاڭباسىن قالدىردى. ۇزاق جىلعى شىعارماشىلىق جولدا جەمىستى ەڭبەك ەتىپ، حالقىمىزدىڭ رۋحاني-مادەني بايلىعىن دامىتۋعا مول ۇلەس قوستى. مارقۇمنىڭ جانى ءجانناتتا، يمانى سالامات بولسىن»، - دەپ جازىلعان جەدەلحاتتا. ەسكە سالا كەتسەك، بۇگىن تاڭەرتەڭ قازاق تەلەۆيزياسىندا 45 جىل قىزمەت اتقارعان جۋرناليستيكا ارداگەرى نۇرتىلەۋ يمانعالي ۇلى ومىردەن ءوتتى.

نۇرتىلەۋ يمانعالي ۇلى «قۇرداستار»، «جاستار داۋىسى»، «اراي»، «جادىڭدا ما، جولداس»، «اينا»، «جاس جىگەر»، «بەتپە-بەت»، «قولتاڭبا»، «دىڭگەك»، «كورشىلەر»، «زاڭ سويلەسىن»، «Nur- Tiley» اۆتورلىق باعدارلامالارى ارقىلى قالىڭ كورەرمەن ەسىندە قالدى.