بايدەن ترامپتىڭ يمپيچمەنتتە اقتالۋىنا قاتىستى پىكىر ءبىلدىردى
ا ق ش- تىڭ جاڭا باسشىسى ەكس-پرەزيدەنت دونالد ترامپ يمپيچمەنت ىسىندە اقتالعانىمەن، ونىڭ بۇلىككە يتەرمەلەۋدەگى كىناسى كۇمان كەلتىرمەيتىنىن مالىمدەدى.
«سوڭعى داۋىس بەرۋ ناتيجەسى ايىپتاۋعا جەتكىزبەسە دە، ونىڭ ءمانى وزگەرىسسىز قالادى. ۇكىم شىعارۋعا قارسى شىققاندار دا، مىسالى سەناتتىڭ ازشىلىق ليدەرى ماككوننەلل دونالد ترامپتى «ۇيات قىلىعى» ءۇشىن كىنالى دەپ سانايدى»، - دەدى بايدەن ترامپتىڭ يمپيچمەنتىنە داۋىس بەرگەن 57 سەناتوردىڭ جەتەۋى رەسپۋبليكاشىل پارتيادان ەكەنىن ەسكە سالىپ.
سونىمەن قاتار، ا ق ش پرەزيدەنتى كاپيتوليگە جاسالعان شابۋىلدى امەريكا تاريحىنداعى قايعىلى وقيعا دەپ اتادى، بۇل دەموكراتيانىڭ نازىك ەكەنىن جانە ونى قورعاۋ كەرەگىن ەسكە تۇسىرەتىنىن مالىمدەدى. ول «امەريكادا زورلىق-زومبىلىق پەن ەكسترەميزمگە جول جوعىن» ەستە ساقتاۋعا شاقىردى.
ال ترامپ ءساتسىز يمپيچمەنت پروتسەسىن «جالماۋىز كەمپىرلەرگە اڭشىلىق» دەپ اتادى، ول «امەريكا ۇلىلىعىن ارتتىرۋداعى جولىن جالعاستىرۋعا» ۋادە بەردى.
ەسكە سالايىق، 13- اقپاندا يمپيچمەنت جاقتاۋشىلارى رەسپۋبليكاشىل سەناتورلاردى بۇرىنعى پرەزيدەنت 6- قاڭتاردا كونگرەستە بولعان بۇلىككە كىنالى دەپ سەندىرە المادى. ترامپقا ۇكىم شىعارۋعا 57 سەناتور، ونىڭ ىشىندە جەتى رەسپۋبليكاشىل داۋىس بەردى جانە 43 زاڭ شىعارۋشى قارسى شىقتى. ايىپتاۋ ۇكىمىن بەكىتۋ ءۇشىن سەناتورلاردىڭ كەمىندە ۇشتەن ەكىسى، ياعني 60 ادام داۋىس بەرۋى كەرەك ەدى. وسىلايشا ترامپ اقتالىپ شىقتى.
