زينەدين زيدان فرانسيا قۇراماسىنىڭ جاتتىقتىرۋشىسى بولۋى مۇمكىن

نۇر-سۇلتان. قازاقپارات - يسپانيالىق «رەال» كومانداسىنىڭ باس باپكەرى زينەدين زيدان فرانسيانىڭ فۋتبول قۇراماسىن جاتتىقتىرۋى مۇمكىن.

بۇل تۋرالى قازاقپارات L'Equipe باسىلىمىنا سىلتەمە جاساي وتىرىپ حابارلايدى.

قازىرگى باپكەر ديدە دەشامنىڭ ۇلتتىق قۇرامامەن كەلىسىمشارتى 2022-جىلى اياقتالادى. ەگەر ول كەلىسىمدى جاڭارتۋدان باس تارتسا، فرانسيا فۋتبول فەدەراتسياسى (ف ف ف) زيدانعا ءوز پوزيتسياسىن ۇسىنا الادى.

«دەشامنىڭ مۇراگەرى كىم؟ ءبىزدىڭ زيدانمەن قارىم-قاتىناسىمىز وتە جاقسى. ەگەر ديدە ۇلتتىق قۇرامانى جاتتىقتىرۋدان باس تارتسا، مەن ءالى دە قىزمەتىمدە جۇرسەم، وندا البەتتە بۇل لاۋازىمدا ءبىرىنشى كورگىم كەلەتىن ادام زيدان بولار ەدى»، - دەدى ف ف ف باسشىسى نوەللە لە گرە.

زيدان 48 جاستا. 2019-جىلى ول «رەال ءمادريدتىڭ» جاتتىقتىرۋشىسى بولىپ تاعايىندالدى. زيداننىڭ يسپانيالىق كلۋبپەن كەلىسىمشارتى 2022-جىلدىڭ 30- ماۋسىمىنا دەيىن جاسالعان.

ول بۇعان دەيىن مادريد كلۋبىن 2016-جىلدان 2018-جىلعا دەيىن جاتتىقتىرعان. ونىڭ باسشىلىعىمەن رەال مادريد چەمپيوندار ليگاسىن ءۇش رەت جەڭىپ الدى. ەكى رەت يسپانيا چەمپيونى اتاندى.

2017-جىلدىڭ سوڭىندا حالىقارالىق فۋتبول فەدەراتسياسى (ف ي ف ا) مەن بەدەلدى فرانسۋز جۋرنالى France Football زيداندى ۇزدىك جاتتىقتىرۋشى دەپ تانىدى. ويىنشى رەتىندە زيدان چەمپيوندار ليگاسىنىڭ جەڭىمپازى بولدى. رەال قۇرامىندا يسپانيا چەمپيونى اتاندى.

1998-جىلى «التىن دوپتى» يەلەندى. زيدانمەن بىرگە فرانسيا الەم (1998) جانە ەۋروپا (2000) چەمپيونى اتاندى.