ا ق ش سەناتى ەكس-پرەزيدەنت دونالد ترامپتىڭ يمپيچمەنتىنە قارسى داۋىس بەردى
ايىپتاۋ ۇكىمىن بەكىتۋ ءۇشىن ونى سەناتورلاردىڭ كەمىندە ۇشتەن ەكىسى قولداۋى كەرەك ەدى، دەپ حابارلايدى «قازاقپارات» ح ا ا «امەريكا داۋىسى» ورىس قىزمەتىنىڭ سايتىنا سىلتەمە جاساپ.
ەكس-پرەزيدەنت دونالد ترامپتىڭ يمپيچمەنتى جونىندەگى مەنەدجەرلەرى رەسپۋبليكالىق سەناتورلاردى بۇرىنعى مەملەكەت باسشىسىنىڭ كونگرەستە بۇلىك تۋدىرعانى ءۇشىن كىنالى ەكەندىگىنە سەندىرە المادى.
ەسكە سالا كەتەيىك، 6- قاڭتاردا ترامپتىڭ جاقتاستارى كونگرەسكە باسىپ كىرگەن بولاتىن. سەنبى كۇنى ترامپتى ايىپتاۋ ۇكىمىن شىعارۋعا 7 رەسپۋبليكاشىل سەناتورى قوسا العاندا 57 سەناتور داۋىس بەردى. 43 زاڭ شىعارۋشى قارسى بولدى. ايىپتاۋ ۇكىمىن بەكىتۋ ءۇشىن ەكس-پرەزيدەنتتىڭ يمپيچمەنتىن بارلىق دەموكراتتار، ەكى تاۋەلسىز سەناتور جانە كەم دەگەندە 17 رەسپۋبليكاشىلار قولداۋى كەرەك بولاتىن.
سەنبى كۇنى تۇستەن كەيىن سەناتتىڭ رەسپۋبليكالىق ازشىلىق ليدەرى ميتچ ماككوننەلل يمپيچمەنتكە قارسى داۋىس بەرەتىندىگىن راستادى. باقىلاۋشىلاردىڭ سەناتتىڭ ۇشتەن ەكىسى دەموكراتتاردىڭ كوزقاراسىن قولدامايتىنىنا كوزدەرى جەتتى.
وسىعان دەيىن ا ق ش كونگرەسىنە ترامپ يمپيچمەنتى تۋرالى رەزوليۋتسيا ۇسىنىلعانى حابارلاندى.
دەموكراتتار 6- قاڭتاردا ا ق ش كونگرەسىندەگى تارتىپسىزدىكتەرگە بايلانىستى ترامپ قىزمەتىندە قالعان جاعدايدا «ۇلتتىق قاۋىپسىزدىككە، دەموكراتيا مەن كونستيتۋتسياعا قاۋىپ توندىرەتىنىنە» سەنىمدى بولدى.
وسىعان قاراي رەزوليۋتسيا اۆتورلارى ترامپقا الداعى ۋاقىتتا سايلانبالى لاۋازىمعا بارۋىنا تىيىم سالۋعا شاقىردى. پرەزيدەنت ترامپقا يمپيچمەنت جاريالاۋ تۋرالى قاۋلىعا وكىلدەر پالاتاسىنىڭ سپيكەرى نەنسي پەلوسي قول قويدى.
كەيىنىرەك ا ق ش- تىڭ وكىلدەر پالاتاسى دونالد ترامپ يمپيچمەنتىنە قاتىستى قۇجاتتاردى سەناتقا جىبەرۋ تۋرالى شەشىم قابىلدادى.
