پرەزيدەنت پارا الۋ ۇستىندە ۇستالعان سۋدياعا قاتىستى پىكىر ءبىلدىردى

تەك سوڭعى 5 جىلدىڭ ىشىندە سىبايلاس جەمقورلىق فاكتىسى ءۇشىن فەميدانىڭ 17 وكىلى جاۋاپقا تارتىلعان. تۇركىستان وبلىسىندا سوتتالعان القا ءتوراعاسى مەن وبلىستىق سوتتىڭ سۋدياسىنا قاتىستى جەمقورلىق دەرەكتەرى قوعامدا ۇلكەن شۋ تۋعىزدى.
«وسىدان بىرەر كۇن بۇرىن ماسقارا جاعداي بولدى. جوعارى سوت كەڭەسىنىڭ بۇرىنعى مۇشەسى، سونداي-اق، اۋداندىق سوتتىڭ ءتوراعاسى بولعان، 30 جىلدىق ەڭبەك ءوتىلى بار جوعارعى سوتتىڭ سۋدياسى ۇستالدى. بۇل وقىس وقيعا جۇرتتىڭ بارىنە بەلگىلى. اتالعان جاعداي قوعامدى تەڭسەلتىپ كەتتى. جوعارى سوت كەڭەسىنىڭ جانە جوعارعى سوتتىڭ باسشىلىقتارى وسى وقيعادان ساباق الىپ، قاجەتتى شەشىم شىعارۋى كەرەك دەپ ويلايمىن. وسى كەزەڭ ىشىندە سوت قازىلارى القاسىنىڭ شەشىمىمەن 29 سۋديا تەرىس ءىس-ارەكەتتەرى ءۇشىن قىزمەتتەرىنەن بوساتىلعان. جالپى سۋديالاردىڭ قاتارىن تازالاۋ جۇمىستارى بەلسەندى جۇرگىزىلىپ جاتقانى بايقالادى. بۇل ۇدەرىستى مۇلدە توقتاتۋعا بولمايدى. ءبىز سۋديالارعا دەگەن قالىپتاسقان تەرىس كوزقاراستى وزگەرتۋىمىز كەرەك. فەميدانىڭ بارلىق قىزمەتكەرى زاڭدىلىقتىڭ، ساتىلمايتىندىقتىڭ، كاسىبيلىكتىڭ ۇستەم قۇرۋىنا قىزمەت ەتۋى ءتيىس. سوندا عانا ءبىز قۇقىقتىق مەملەكەت جانە ادىلەتتى قوعام قۇرا الامىز»، - دەدى قاسىم-جومارت توقايەۆ.
ەسكە سالا كەتەيىك، بۇگىن مەملەكەت باسشىسى سوت جۇيەسىن جاڭعىرتۋ ماسەلەلەرى جونىندە كەڭەس وتكىزدى. ءبىز بۇعان دەيىن جوعارعى سوتتىڭ سۋدياسى ءىرى كولەمدە پارا الىپ جاتقاندا ۇستالعانىن جازعان بولاتىنبىز.