پرەزيدەنت ءبىلىم جانە عىلىم ءمينيسترىن قابىلدادى

نۇر- سۇلتان. قازاقپارات - مەملەكەت باسشىسى ءبىلىم جانە عىلىم ءمينيسترى اسحات ايماعامبەتوۆتى قابىلدادى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

قاسىم- جومارت توقايەۆقا قازاقستان حالقىنا ارنالعان جولداۋدا، سونداي- اق، ۇلتتىق قوعامدىق سەنىم كەڭەسىندە جانە ۇكىمەتتىڭ كەڭەيتىلگەن وتىرىسىندا بەرىلگەن تاپسىرمالاردىڭ ورىندالۋ بارىسى تۋرالى ەسەپ بەرىلدى.

اسحات ايماعامبەتوۆ پرەزيدەنتكە مينيسترلىكتىڭ پەداگوگتەر مارتەبەسىن ارتتىرۋ جونىندەگى شارالاردى بەلسەندى ىسكە اسىرىپ جاتقانى، مۇعالىمدەردىڭ ەڭبەكاقىسى 25 پايىزعا ارتقانى تۋرالى باياندادى. بيىل 200 جاڭا مەكتەپ سالۋ جوسپارلانىپ وتىر.

مەملەكەت باسشىسىنا پاندەميا كەزىندەگى وقۋ ۇدەرىسىنىڭ احۋالى جانە وقۋشىلاردىڭ ءبىلىمىن تولىقتىرۋ ءۇشىن قابىلدانعان شارالار، سونداي- اق، بالالارعا قولايلى ورتا قالىپتاستىرۋ جانە «كىتاپ وقيتىن مەكتەپ» جوباسىن ىسكە اسىرۋ جونىندە اقپارات بەرىلدى.

كەزدەسۋدە بالالاردىڭ قۇقىقتارىن قورعاۋ، وتاندىق كوللەدجدەر مەن جوعارى وقۋ ورىندارىن دامىتۋ، جوعارى ءبىلىم بەرۋ ساپاسىن ارتتىرۋ، اكادەميالىق ەركىندىكتى قامتاماسىز ەتۋ جانە وقۋ ورىندارىن ودان ءارى وڭتايلاندىرۋ ماسەلەلەرى تالقىلاندى. كەزدەسۋ قورىتىندىسى بويىنشا پرەزيدەنت قازاقستاننىڭ ءبىلىم جانە عىلىم سالاسىن ودان ءارى جەتىلدىرۋ ءۇشىن مينيسترلىككە ءبىرقاتار مىندەت جۇكتەدى.