قاسىم- جومارت توقايەۆ وڭىرلەردەگى الەۋمەتتىك ماسەلەلەردى شەشۋگە ايەلدەردى جۇمىلدىرۋ جوباسىن وڭ باعالادى
قاسىم- جومارت توقايەۆقا ۇلتتىق كوميسسيانىڭ اتقارعان جۇمىستارى جانە الدىڭعى كەزەڭگە ارنالعان جوسپارلارى تۋرالى ەسەپ بەرىلدى. كەزدەسۋدە وتباسى ينستيتۋتىن نىعايتۋعا، وتباسىلىق قۇندىلىقتاردى ساقتاۋعا، ايەلدەر مەن بالالارعا قاتىستى زورلىق- زومبىلىققا جول بەرمەۋگە، الەۋمەتتىك ماسەلەلەردى شەشۋگە باعىتتالعان زاڭناما نورمالارىن جەتىلدىرۋ ماسەلەلەرى قاراستىرىلدى.
مەملەكەت باسشىسىنىڭ پىكىرىنشە، زاڭ جوباسىن پىسىقتاۋعا ورتالىق جانە جەرگىلىكتى اتقارۋشى ورگانداردىڭ ءبارى جۇمىلدىرىلۋى ءتيىس. وتباسى ينستيتۋتىن بارلىق دەڭگەيدە نىعايتۋ ماسەلەلەرى بويىنشا مەكەمەارالىق ءوزارا ءىس- قيمىلدىڭ ءتيىمدى رەگلامەنتىن ازىرلەۋ قاجەت.
پرەزيدەنت ايەلدەر ىستەرى جانە وتباسىلىق- دەموگرافيالىق ساياسات جونىندەگى ايماقتىق كوميسسيالاردىڭ جۇمىس ىستەۋ تاسىلدەرىنە ەنگىزىلىپ وتىرعان ۇسىنىستاردى قولداپ، ولارعا ازاماتتىق قوعاممەن تىعىز بايلانىس ورناتۋ قاجەت ەكەنىن اتاپ ءوتتى. وتباسىلىق جانە گەندەرلىك ساياسات تۇجىرىمداماسىن ىسكە اسىرۋ اياسىندا العا قويىلعان ماقساتتار مەن مىندەتتەرگە قول جەتكىزۋ ءۇشىن ءوڭىر اكىمدەرىنە ۇلكەن جاۋاپكەرشىلىك جۇكتەلۋى ءتيىس.
كەزدەسۋدە ەلىمىزدىڭ قوعامدىق- ساياسي ومىرىنە ايەلدەردىڭ ارالاسۋ ماسەلەسى قوزعالدى. مەملەكەتتىك ورگاندارداعى، كۆازيمەملەكەتتىك جانە كورپوراتيۆتىك سەكتورلارداعى ايەلدەردىڭ تەڭ قۇقىقتارى مەن مۇمكىندىكتەرىن ساقتاۋ ولاردىڭ قىزمەتىنىڭ تيىمدىلىگىن باعالاۋدىڭ نەگىزگى شارتى مەن كورسەتكىشتەرىنىڭ ءبىرى بولۋى ءتيىس. سونىمەن قاتار قاسىم- جومارت توقايەۆ وڭىرلىك دەڭگەيدەگى قوعامنىڭ الەۋمەتتىك ماسەلەلەرىن شەشۋگە ايەلدەردى جۇمىلدىرۋ جوباسىن وڭ باعالادى.
