مەملەكەت باسشىسى ءمادينا ءابىلقاسىموۆاعا ءبىرقاتار مىندەتتەردى جۇكتەدى
مەملەكەت باسشىسىنا قازاقستان قارجى نارىعىنىڭ بىلتىرعى دامۋ قورىتىندىلارى جانە اگەنتتىكتىڭ بيىلعا ارنالعان جۇمىسىنىڭ نەگىزگى باسىمدىقتارى تۋرالى باياندالدى. قاسىم- جومارت توقايەۆقا 2020 -جىلدىڭ قورىتىندىسى بويىنشا ەكونوميكانى كرەديتتەۋدىڭ 5,5 پايىزعا ۇلعايىپ، 14,6 تريلليون تەڭگەگە جەتكەنى جايىندا ايتىلدى.
داعدارىسقا قاراماستان، شاعىن جانە ورتا بيزنەسكە بەرىلەتىن كرەديتتەر، ونىڭ ىشىندە، بيزنەسكە قولداۋ كورسەتۋدىڭ مەملەكەتتىك باعدارلامالارىن كەڭەيتۋ ارقىلى 7,1 پايىزعا، ياعني 4,2 تريلليون تەڭگەگە دەيىن وسكەن. پرەزيدەنتتىڭ تاپسىرماسى بويىنشا ەكونوميكانىڭ زارداپ شەككەن سەكتورلارىنداعى شاعىن جانە ورتا بيزنەستىڭ بارلىق كرەديتتەرىن جىلىنا 6 پايىزعا دەيىن سۋبسيديالاۋ تەتىگى ىسكە اسىرىلدى.
ءمادينا ءابىلقاسىموۆا بيىلعى 1 - قاڭتاردان باستاپ بارلىق ميكروقارجىلىق ۇيىمداردىڭ، ونىڭ ىشىندە، لومباردتار مەن ونلاين- كرەديتتەۋ كومپانيالارىنىڭ قىزمەتىن ليتسەنزيالاۋ ەنگىزىلگەنى تۋرالى حابارلادى. بۇل ولاردىڭ ەسەپ بەرۋىن، اشىقتىعىن جانە جاۋاپكەرشىلىگىن قامتاماسىز ەتۋگە مۇمكىندىك بەرەدى. مەملەكەت باسشىسىنىڭ تاپسىرماسى بويىنشا حالىقتىڭ بورىشتىق جۇكتەمەسىن ازايتۋ جونىندەگى رەتتەۋ شارالارى قابىلداندى. سونىڭ ارقاسىندا تۇتىنۋشىلىق كرەديتتىڭ ءوسۋى ازايدى. بيىل قارىز الۋشى جەكە تۇلعالاردى وڭالتۋ جانە كرەديتتەر بويىنشا سىياقىنىڭ شەكتى مولشەرلەمەلەرىن رەتتەۋ تەتىكتەرى ەنگىزىلەدى، قارىزىن قايتارمايتىن ادامدارعا قاتىستى رەتتەۋ قىزمەتىنىڭ سوتقا دەيىنگى ءتارتىبى كۇشەيتىلەدى.
2021 -جىلدان باستاپ ازاماتتارعا زەينەتاقى اكتيۆتەرىنىڭ ءبىر بولىگىن جەكە باسقارۋشى كومپانيالاردىڭ باسقارۋىنا بەرۋ، ال بانكتەرگە بروكەرلىك قىزمەتتەردىڭ تولىق سپەكترى بويىنشا قىزمەت كورسەتۋ مۇمكىندىگى بەرىلدى. بۇل ءوز كەزەگىندە حالىقتىڭ ينۆەستيتسيالىق مۇمكىندىگىن ارتتىرادى. ساقتاندىرۋ جانە قور نارىعىن ودان ءارى دامىتۋ ماقساتىندا كەشەندى زاڭ جوباسى ازىرلەندى.
قاسىم- جومارت توقايەۆ بانك سەكتورىنىڭ تۇراقتىلىعىن قامتاماسىز ەتۋگە ەرەكشە ءمان بەردى. اگەنتتىك ءتوراعاسى جەكەلەگەن بانكتەردىڭ جۇمىسىن قايتا جانداندىرۋ جونىندە قابىلدانعان شارالار جانە AQR ناتيجەلەرى بويىنشا قاداعالاۋ جوسپارلارىن ىسكە اسىرۋ تۋرالى ايتتى. 2020 -جىلى بانك جۇيەسى بويىنشا بورىشكەرلىك دەڭگەيى 8,1 پايىزدان 6,8 پايىزعا دەيىن تومەندەدى. تاۋەكەلگە باعدارلانعان قاداعالاۋ اياسىندا 2021 -جىلدان باستاپ بانك سەكتورى اكتيۆتەرىنىڭ ساپاسىن باعالاۋ (AQR) جانە سترەسس- تەستتەن وتكىزۋ قاداعالاۋ پروتسەسىنىڭ اجىراماس بولىگى بولادى.
كەزدەسۋ قورىتىندىسى بويىنشا قاسىم- جومارت توقايەۆ اگەنتتىككە قارجىلىق تۇراقتىلىقتى قامتاماسىز ەتۋدى، قارجى نارىعىنىڭ بارلىق سەكتورىندا تاۋەكەلگە باعدارلانعان قاداعالاۋ جۇيەسىن ەنگىزۋدى، قارجىلىق قىزمەت كورسەتۋ بارىسىندا تۇتىنۋشىلار قۇقىعىن قورعاۋدى، سونداي- اق، قور نارىعىن دامىتۋدى مىندەتتەدى. مەملەكەت باسشىسى داعدارىس سالدارىن ەڭسەرۋ ءۇشىن ەكونوميكانى كرەديتتەۋدىڭ ماڭىزىنا نازار اۋداردى.
