قازاقستاندىق ۆاكسينانى رەسەيلىك ەكپەمەن سالىستىرۋ قيسىنسىز – عالىم
«Qaz Covid-in ۆاكسيناسىن زەرتتەۋ جىل بويى جۇرگىزىلدى. كلينيكالىق زەرتتەۋلەر قىركۇيەك ايىندا باستالدى. باستاپقىدا 44 ەرىكتى وسىعان قاتىسقان بولاتىن. كلينيكالىق زەرتتەۋدىڭ ءبىرىنشى فازاسى ۆاكسينانىڭ قاۋىپسىزدىگىن زەرتتەۋگە قاتىستى ەدى. ناتيجەسىندە، 180 كۇن بويى جۇرگىزىلگەن بايقاۋ كەزىندە ەشقانداي كۇردەلى تەرىس اسەرلەر تىركەلمەدى. ۆاكسينا قاۋىپسىز دەپ تانىلدى»، - دەدى ا. گۋليايەۆ ورتالىق كوممۋنيۋكاتسيالار قىزمەتىندە.
سونىمەن قاتار ول ەكىنشى كەزەڭدە ۆاكسينانىڭ كلينيكالىق تيىمدىلىگى زەرتتەلگەنىن، وعان 200 ەرىكتى قاتىسقانىن ەسكە سالدى.
«180 كۇن بويى ۆاكسينالاۋ جاسالعاننان كەيىن، قالىپتاساتىن انتيدەنەلەر دەڭگەيى تەكسەرىلىپ تۇردى. ۆاكسينا جوعارى تيىمدىلىكتى كورسەتىپ، ەكپە جاسالعان ءاربىر جاعدايدا انتيدەنەلەر قالىپتاسىپ وتىردى. ءۇشىنشى كەزەڭ 2020 -جىلدىڭ 25 - جەلتوقسانىندا باستالدى. بۇل رەتتە زەرتتەۋمەن 3000 ادام قامتىلدى جانە ول 180 كۇنگە سوزىلادى. ءۇشىنشى فازانىڭ وتۋىنە قاتىستى ارالىق ەسەپ جاقىن ارادا بولادى»، - دەدى عالىم.
ساراپتاما جۇرگىزۋ ەرەجەسىنە سايكەس، 31 - جەلتوقساندا Qaz Covid-in ۆاكسيناسى ۋاقىتشا تىركەۋ كۋالىگىن الدى. بۇل ءوز كەزەگىندە ۆاكسينانى زەرتتەۋدى كەڭەيتىپ، ونىڭ ءوندىرىسىن جەدەلدەتەدى.
« Qaz Covid-in - يناكتيۆتەلگەن ەكپە. بۇل تۇرعىدا ول رەسەيلىك ۆاكسينادان وزگەشە. رەسەيلىك ەكپە انتيدەنەلەر قالىپتاسۋىن باستاۋشى اقۋىزدى قۇرايدى. وسى ۆاكسينالاردى تىكەلەي سالىستىرۋ قيسىنسىز. تىكەلەي سالىستىرۋ بارلىق ءۇش فازانىڭ زەرتتەۋ مالىمەتتەرى الىنعاندا مۇمكىن بولادى. سول كەزدە بۇل ۆاكسينالاردىڭ باسىمدىعى نەمەسە كەمشىلىگى تۋرالى تۇسىنىك بەرىلەدى»، - دەدى ساراپشى.
وسى ورايدا ول ءۇش فازانىڭ تولىق كلينيكالىق زەرتتەۋى الەمدە جۇرگىزىلمەگەنىن ايتتى.
«جالپى احۋال رەتتەۋشى ورگاندارعا ۋاقىتشا تىركەۋلەردى بەرۋگە جانە ۆاكسينالاۋ جۇرگىزۋدى باستاۋعا يتەرمەلەپ وتىر. بۇل ءوز كەزەگىندە قانداي دا ءبىر قاۋىپسىزدىك ەرەجەلەرى ەسكەرىلمەي جاتىر دەگەندى بىلدىرمەيدى. جاپونيا، ا ق ش، ەۋروپادا جانە قازاقستاندا ۆاكسينالاردىڭ قاۋىپسىزدىگى مەن تيىمدىلىگىن باعالاۋ قادامدارىندا ەشقانداي ايىرماشىلىق جوق. وسى باعىتتاعى جۇمىستار ايتارلىقتاي ۇزاق پروتسەسس»، - دەدى عالىم.
الەكساندر گۋليايەۆتىڭ ايتۋىنشا، قازىرگى ۋاقىتتا ق ر د س م دارىلىك زاتتار مەن مەديتسينالىق ماقساتتاعى بۇيىمداردى ساراپتاۋ ۇلتتىق ورتالىعىنا ۆاكسينالاردان جاعىمسىز كۇردەلى اسەرى تۋرالى اقپارات كەلىپ تۇسپەگەن.
اۆتور: رۋسلان عابباسوۆ
