اقپان ايىندا ەلوردادا قانشا ادامعا ۆاكسينا سالىناتىنى بەلگىلى بولدى
بۇل تۋرالى ورتالىق كوممۋنيكاتسيالار قىزمەتىندە نۇر- سۇلتان قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ءمالىم ەتتى، دەپ حابارلايدى قازاقپارات ءتىلشىسى.
«اقپان ايىندا 2030 دوزا ۆاكسينا سالىنادى دەپ جوسپارلاپ وتىرمىز. قازىرگى ۋاقىتتا 719 ادام ۆاكسيناسىن (1-8-اقپان ارالىعىندا) الىپ ۇلگەردى. قالعانى وسى ايدىڭ ىشىندە ەكپە سالدىرادى. سوعان قوسا، بۇل ۆاكسينانىڭ ەكىنشى كومپونەنتىن دە وسى ايدىڭ سوڭىنان باستاپ جاسايتىن بولامىز»، - دەدى ت. مۇراتوۆ ورتالىق كوممۋنيكاتسيالار قىزمەتىندە.
سونىمەن قاتار ول ۆاكسينا العان ادامداردىڭ اراسىندا ايتارلىقتاي كەرى رەاكسيا بولماعانىن جەتكىزدى. «ۆاكسينا سالعان ورىننىڭ اۋىرۋى جانە كەشكە تامان ادامنىڭ ءسال السىرەۋىن كەرى رەاكسيا دەپ ايتۋعا بولمايدى. ۆاكسينا العان ادام ءۇشىن ول قالىپتى جاعداي. مەن ءوزىم ۆاكسينا الدىم، ءبىرىنشى كۇننىڭ كەشىندە سونداي كوڭىل-كۇيدە بولدىم. ەكىنشى كۇنى بۇل كۇي وزدىگىنەن كەتىپ قالدى»، دەپ ءتۇسىندىردى باسقارما باسشىسى. ت. مۇراتوۆ ۆاكسينادان ءوز ەركىمەن باس تارتقان مەديتسينا قىزمەتكەرلەرى تۋرالى ايتتى.
«ۆاكسينا سالدىرۋدان باس تارتقان ازاماتتار بار دەپ ايتىپ وتىرمىز. ولاردىڭ ىشىندە مەديتسينا قىزمەتكەرلەرىنە ەكپە سالدىرىپ جاتىرمىز. وزدەرىڭىز كورىپ وتىرعانداي، جوسپار بويىنشا مىڭنان اسا ادامعا جاساۋ كەرەك ەدى (1-8-اقپان ارالىعىندا ۆاكسيانالاۋعا 916 ادام)، سونىڭ ىشىندە 719 ىنا جاساپ ۇلگەردىك. ءوز ەركىمەن باس تارتقاندار 5 ادام عانا. ولار ءوزىنىڭ ويىمەن، تۇسىنىگىمەن ازىرشە ۆاكسينا المايمىز دەپ شەشتى. قالعان ۆاكسينا سالدىرماعان ادامدارعا توقتالساق، ولارعا مەديتسينالىق قارسى كورسەتىلىمى بويىنشا قويىلمادى»، - دەدى ول.
بۇدان بۇرىن حابارلانعانداي، ەلوردانىڭ قوعامدىق دەنساۋلىق ساقتاۋ باسقارماسىنىڭ قويماسىندا ك ۆ ي-عا قارسى ۆاكسينانىڭ 1531 دوزاسى بار.
اۆتور: رۋسلان عابباسوۆ
