«كەتپەيمىن، ايتپەسە ءسىزدى جەيدى» - ش ق و-دا جاس ءوسپىرىم اناسىن قاسقىردان قۇتقاردى

كۇرشىم. قازاقپارات - شىعىس قازاقستان وبلىسى كۇرشىم اۋدانىندا اناسى مەن بالاسىنا قاسقىر شاپتى.

قاس- قاعىم ساتتە اجالمەن بەتپە-بەت كەلگەن اسەم بەكسولتانوۆا مەن ۇلى جىگەر ءتۇز تاعىسىمەن ارپالىسۋدان دا تايىنباعان. سول ءبىر ۇستارانىڭ جۇزىندە تۇرعان سىن ساعاتتى ولار قازاقپارات تىلشىسىنە تارقاتىپ ايتىپ بەردى.

ءتۇز تاعىسى تاپ بەرگەن

قاڭتار ايىنىڭ 30 ى كۇنى مارالدى اۋىلىندا تۇراتىن وتباسى ۇيلەرىندە قاننەن-قاپەرسىز جاتقان. «ساعات 21.00 كەزى. ەندى ۇيىقتايىق دەپ جاتقانبىز. وسى كەزدە كورشىمىز «ءۇي ماڭىندا قاسقىر ءجۇر» دەپ حابارلاسىپ، ويىمىز ءاپ-ساتتە سان-ساققا كەتتى. شىقساق، اۋلادا قولدارىنا شام ۇستاعان كورشىلەر ءجۇر ەكەن»، - دەدى سەگىزىنشى سىنىپتا وقيتىن جىگەر. اناسى اسەم بەكسولتانوۆانىڭ ايتۋىنشا، قاسقىر مالعا شاپپاق بولعان سىڭايلى.

«قولىمدا سيىر ايدايتىن شىبىق. جىگەر ەكەۋىمىز جۇرە بەردىك. ءبىر كەزدە ۇلىم «ماما، قاراڭىزشى، اناۋ قاشانىڭ تۇبىندە ءبىزدىڭ يت جاتقان سياقتى!» دەگەن سوڭ نازارىمىز سول جاققا اۋدى. اق ءتوسىمىز تاعىنىڭ ارانىندا قالدى ما دەگەن وي كەلدى. ال قاسقىر شابادى دەگەن وي سانامىزدا ساعىم دا بەرمەگەن»، - دەدى ول. اناسى مەن ۇلى الگى يت جاتقان جەرگە كەلدى. ەشنارسە كورىنبەيدى. سويتكەنشە بولمادى، ازۋى ىرسيعان قاسقىر اتىلىپ كەپ سەكىرگەن.

«سول قولىمدى كوتەرىپ ۇلگەردىم. جان بەرگەن وڭاي ما، وتكىر تىرناعى قابىرعامنىڭ جوعارى تۇسىن تىرناپ كەتتى. ىرىلداپ، مەنى جەمتىك ەتۋگە وقتالعان قاندىاۋىز قولىمنان ايىرىلار ەمەس»، - دەدى اسەم ءسوزىن ساباقتاپ.

«كەتپەيمىن، ايتپەسە ءسىزدى جەيدى!»

جىگەر وقيعانىڭ بايىبىنا بارا الماي، اڭتارىلىپ قالىپتى. «اكەڭدى شاقىر! بار! قاش!» دەپ جانۇشىرا ايقايلاسا دا اناسىن تاستاپ كەتكىسى جوق. ءۇش- ءتورت قادام جاساعان سوڭ «ا- ا- ا!» دەپ ايقايلاپ، اجالمەن ارپالىسقان شەشەسىنىڭ جانىنا جەتتى.

«كەتپەيمىن، ايتپەسە ءسىزدى جەيدى!» دەگەن جۇرەكتى جاس ءوسپىرىم قاسقىردىڭ جۇنىنەن جۇلا باستادى. «قاسقىردى قاپسىرا ۇستاپ، جۇلقىلاپ كوردىم. بوگدە ادامنىڭ كەدەرگىسىن سەزگەن ءتۇز تاعىسى ماعان جالت بۇرىلعاندا ءسۇرىنىپ كەتتىم. سول جاق سانىمنان تىستەپ الىپ، جۇلقىلاي جونەلدى. باسىنان شاپ بەرىپ ۇستاپ ەدىم، قاتتى شوشىعانىمنان قايتا جىبەرە سالدىم»، - دەدى جىگەر.

سول قولىنىڭ بىلەگى جىرىمدالعان اناسى دا قۇلاپ تۇسكەن. كەنەت ۇلىنا شاپقان قاسقىر اۋلادان بەزىپ بارادى. وسى كەزدە وتاعاسى مۇقان بەكسولتانوۆ ايىرمەن قاسقىردى الىپ ۇردى. ەر ادام اشۋدان با، الدە قورقىنىشتان با، ايتەۋىر جىرتقىشقا ايىرىن قاداي بەرىپتى، قاداي بەرىپتى.

قۇتىرىققا قارسى ۆاكسينا سالىندى

وسىنىڭ بارلىعى بىرنەشە مينۋت ىشىندە بولعان جايت. باستىسى، وتباسى مۇشەلەرى امان. ۇيىرىنەن بولىنگەن يتقۇس تا سول جەردە ءولدى. 15 جاستاعى جىگەردىڭ جانكەشتىلىگى دە قايران قالدىرماي قويمادى. جاراقاتى تەرەڭ اناسى مەن بالاسىنا كورشىلەرى دە دەرەۋ جەتىپ، العاشقى كومەكتەرىن كورسەتكەن. ساعات 22:00-دەن كەتە «جەدەل جاردەم» كەلىپ، جارالى جانداردى اۋداندىق اۋرۋحاناعا جەتكىزدى.

«قازىرگى ۋاقىتتا ناۋقاستاردىڭ جاعدايى قاناعاتتانارلىق. دەگەنمەن اسەم قاجىمبەك قىزىنىڭ جاراسى تەرەڭ، تامىرلارى جارىلىپ، قان جوعالتقان. اۋرۋحاناعا تۇسە سالىسىمەن رەنتگەنگە تۇسىردىك. ساۋساق سۇيەگى سىنعان. جاراسى تەرەڭ بولعاندىقتان ونىڭ بىتۋىنە دە ۇزاق ۋاقىت قاجەت. ءتيىستى ەكپەلەر ەگىلۋدە. جىگەرگە دە قۇتىرىققا قارسى ۆاكسينا سالىندى. ابىروي بولعاندا، جاراسى تەرەڭ ەمەس. قاسقىردىڭ باسى وسكەمەن قالاسىنداعى ۆەتەرينارلىق زەرتحاناعا جىبەرىلدى. سودان قۇتىرىق اۋرۋى شىقپاسا ەكەن دەيمىز»، - دەدى اۋداندىق اۋرۋحانانىڭ حيرۋرگ دارىگەرى بەكمۇرات جۇماتوۆ.

اۆتور: تالعاتجان مۇحامەتبەك ۇلى