نۇر- سۇلتاندا «عاشىق- جۇرەك» پوەتيكالىق- مۋزىكالىق قويىلىمىنىڭ پرەمەراسى وتەدى
وسىعان وراي، نۇر- سۇلتان قالاسى مۋزىكالىق جاس كورەرمەن تەاترى قازاق پوەزياسىندا وشپەس ءىز قالدىرعان مۇقاعالي ماقاتايەۆتىڭ 90 جىلدىعىنا ارناپ، ونىڭ تۋعان كۇنى قارساڭىندا، ياعني 9، 10، 11-اقپان كۇندەرى «عاشىق- جۇرەك» پوەتيكالىق- مۋزىكالىق قويىلىمىنىڭ پرەمەراسىن كورەرمەندار نازارىنا ۇسىنباق، دەپ حابارلايدى قازاقپارات تەاتردىڭ باسپا ءسوز مالىمەتتەرىنە سىلتەمە جاساپ.
قويىلىمنىڭ قويۋشى- رەجيسسەرى - امان عۇماروۆ. «عاشىق- جۇرەك» سپەكتاكلى اۆتوردىڭ وي- ارمانىنان، جان سارايىنان، ىشكى تانىمى مەن تولعانىسىنان تۋعان ولەڭ- جىرلارى مەن اندەرىنە قۇرىلعان ساحنالىق قويىلىم.
«سونىمەن بىرگە، وتان- انا مەن تابيعات- انانىڭ بولمىس- ءبىتىمىن ارقاۋ ەتكەن، ماحاببات، عاشىقتىق پەن دوستىق، جاقسىلىق پەن جالعاندىق سەكىلدى سان قىرلى تاقىرىپتاردى سۋرەتكەرلىكپەن جىرلاي بىلگەن تۇلعانىڭ ءومىر حاقىنداعى وي- تولعامى ىسپەتتەس. پوەتيكالىق- مۋزىكالىق قويىلىم جىرعا ىڭكار كورەرمەندى رۋحانيات الەمىمەن تىلدەستىرىپ، ولاردىڭ جۇرەگىندەگى ادامي قۇندىلىقتاردى بايىتىپ، وقىلاتىن ولەڭدەردەگى تاقىرىپتار مەن ورىندالاتىن اندەردەگى وقيعالاردى جاس كورەرمەننىڭ كوكىرەگىنە توقىپ، ساناسىنا سىڭىرەدى. قازاق پوەزياسىنىڭ ۇلى تۇلعالارىنىڭ ءبىرى مۇقاعالي ماقاتايەۆتىڭ شىعارماشىلىعىنا دەگەن قۇشتارلىعىن كۇشەيتىپ، سۇيىسپەنشىلىك سەزىمىن جانداندىرادى»، - دەلىنگەن حابارلامادا.
اتالمىش قويىلىمدا مۇقاعالي ماقاتايەۆتىڭ بەينەسىن تەاتر اكتەرى قازبەك ەسقارا، ال اقيىق اقىننىڭ دوسى ءشامىلدىڭ بەينەسىن تەاتر اكتەرلەرى ەرنازار جاڭاتىلەك جانە اسقار جۇمابەكوۆ سومدايدى. سونداي- اق، سپەكتاكلگە تەاترىمىزدىڭ بارلىق ارتيستەرى قاتىسادى.
باستالۋى: 9، 10، 11 اقپان، 19:00 ۇزاقتىعى: 1 ساعات، 10 مينۋت، وتەتىن ورنى: نۇر- سۇلتان قالاسى، مۋزىكالىق جاس كورەرمەن تەاترىنىڭ عيماراتى، ج. وماروۆ كوشەسى، 47 ب.
