الماتىدا ەۋرازيالىق ۇكىمەتارلىق كەڭەس وتىرىسى ءوتىپ جاتىر

الماتى. قازاقپارات - الماتىدا ەۋرازيالىق ۇكىمەتارالىق كەڭەسىنىڭ كەزەكتى وتىرىسى ءوتىپ جاتىر. ءىس- شاراعا قازاقستان، رەسەي، ارمەنيا، بەلارۋس، قىرعىزستاننىڭ ۇكىمەت باسشىلارى جانە ەۋرازيالىق ەكونوميكالىق كوميسسيا القاسىنىڭ ءتوراعاسى قاتىسۋدا، دەپ حابارلايدى قازاقپارات ءتىلشىسى.

كۇن تارتىبىندە ساۋدا- ەكونوميكالىق ىنتىماقتاستىقتى كەڭەيتۋ، ىشكى نارىقتىڭ دامۋىنا جول بەرمەيتىن كەدەرگىلەردى جويۋ، سونداي- اق ەكونوميكانىڭ جەكەلەگەن سالالارىندا ينتەگراتسيالىق الەۋەتتى دامىتۋ ماسەلەلەرى قارالىپ جاتىر. سونداي- اق، ەۋرازيالىق ەكونوميكالىق كوميسسيا مەن ت م د اتقارۋشى كوميتەتى اراسىنداعى بايلانىستى بۇدان ءارى نىعايتۋعا ارنالعان جۇمىس جوسپارى دا بەكىتىلەدى.

ق ر پرەمەر- ءمينيسترى اسقار مامين ءوز سوزىندە جوعارى ەۋرازيالىق ەكونوميكالىق كەڭەستىڭ شەشىمىنە سايكەس، قازاقستان 2021 -جىلدىڭ 1 - قاڭتارىنان باستاپ ەاەو ورگاندارىنىڭ وكىلدىگىن قابىلداعانىن اتاپ ءوتتى. وسىعان وراي، مەملەكەت باسشىسى قاسىم- جومارت توقايەۆ ەاەو مۇشە مەملەكەتتەرگە قازاقستان رەسپۋبليكاسىنىڭ 2021 -جىلعا ارنالعان نەگىزگى باسىمدىقتارى تۋرالى ۇندەۋ جولدادى.

«بىرىنشىدەن، ءبىز وندىرىستىك كووپەراتسيانى دامىتۋعا كۇش سالامىز. ءبىزدىڭ مىندەتىمىز - ەلدىڭ باسەكەلەستىك الەۋەتىن تولىق ىسكە اسىرۋ. پرەزيدەنت قاسىم- جومارت توقايەۆ اتاپ وتكەندەي، ءبىز ەاەو اياسىنداعى وندىرىستىك ىنتىماقتاستىقتىڭ نەگىزگى باعىتتارىن تولىعىمەن قايتا قاراپ، جاڭارتۋىمىز كەرەك. ەكىنشىدەن، ەلدەگى ساۋدا- ساتتىق اراسىنداعى كەدەرگىلەردى جويۋ كەرەك. شەكتەلگەن ديناميكا مەن سىرتقى سۇرانىس جاعدايىندا جانە ورتاق نارىقتىڭ جۇمىس ىستەۋى مەن قول جەتىمدىلىگى بويىنشا ەاەو ماڭىزدىلىعى ارتىپ كەلەدى. ءبىزدىڭ وندىرىستىك جۇيەلەردىڭ باسەكەگە قابىلەتتى ارتىقشىلىقتارىن تولىعىمەن ىسكە اسىرۋ ءۇشىن كەدەرگىلەرىنىڭ پايدا بولۋىنا جول بەرمەۋ كەرەك. ياعني، تاركىلەۋلەردى بارىنشا ازايتىپ، تاۋارلاردىڭ ەركىن قوزعالىسىنا جاعداي جاساۋ قاجەت.

ۇشىنشىدەن، ءبىز ەاەو حابى ءۇشىن ترانسشەكارالىق ارتەرياسىنىڭ ينۆەستيتسيالىق الەۋەتىن جاقسارتۋعا كۇش سالۋىمىز كەرەك. قازىرگى جاعدايلار بىزگە ەاەو الەۋەتىن پايدالانۋعا مۇمكىندىك بەرەدى. ويتكەنى، بۇل ايماقتاعى عانا ەمەس، الەمدەگى ەڭ ماڭىزدى ساۋدا- كولىك حابى . بۇل جۇمىستا ءبىز ەۋرازيالىق ينتەگراتسيالىق قاۋىمداستىقتىڭ «ءبىر بەلدەۋ، ءبىر جول» باستاماسىمەن بايلانىستىرىپ، ەۋرازيا ەلدەرىنىڭ باسەكەگە قابىلەتتىلىگىن، ترانزيتتىك باعىتتاردىڭ قىزمەتىن جانە ۇلتتىق تاۋارلاردى تاراتۋ جۇيەسىن ينتەگراتسيالاۋدى بىرىكتىرۋ يدەياسىن جالعاستىرۋىمىز كەرەك.

تورتىنشىدەن، ءبىز سيفرلاندىرۋ بويىنشا جۇمىسىمىزدى كۇشەيتۋىمىز قاجەت. ەاەو ديناميكانى ەسكەرە وتىرىپ، ونىڭ ارتىقشىلىقتارىن نەمەسە ارتتا قالۋ سەبەبىن انىقتايدى. ءبىز سيفرلىق باستامالاردى جوبالاۋ مەن جۇزەگە اسىرۋداعى ىنتىماقتاستىق تاسىلدەردى جاڭارتامىز. بۇگىن سيفرلىق فورۋمى اياسىندا وسى وزەكتى ماسەلەلەردى تالقىلاۋعا مۇمكىندىك الدىق.

بەسىنشىدەن، ءۇشىنشى ەلدەرمەن جانە ينتەگراتسيالىق بىرلەستىكتەرمەن ساۋدا- ەكونوميكالىق قاتىناستاردى كەڭەيتۋ بويىنشا جۇمىستى جانداندىرۋ قاجەت. ەۋروپالىق وداقپەن، وڭتۇستىك- شىعىس ازيا ەلدەرى قاۋىمداستىعىمەن ديالوگ قۇرۋ ءۇشىن جۇيەلى جۇمىس جۇرگىزىلۋى ءتيىس. مۇنداي بايلانىس ەاەو تاۋارلارى مەن قىزمەتتەرىنىڭ سىرتقى نارىققا شىعۋىنا جانە ەكونوميكانى حالىقارالىق دەڭگەيدە ينتەگراتسيالانۋىنا جاعداي جاسايدى»، - دەدى اسقار مامين.

سونىمەن قاتار، ۇكىمەت باسشىسى قارقىندى تەندەنسيالار، سونىڭ ىشىندە ونداعان جىلدار بويى وندىرىستە قالىپتاسقان قازىرگى جاعداي مەن نارىقتاعى قاتاڭ باسەكەلەستىكتى ىعىستىرۋ وڭاي ەمەستىگىن اتاپ ءوتتى.

«ءبىز ءبىرتۇتاس ەكونوميكالىق، وندىرىستىك جانە ساۋدا ساياساتىن قۇرۋىمىز كەرەك. وسىعان بايلانىستى ءبىزدىڭ جۇمىس باعىتىمىز ورتاق مۇددەمىزگە تولىق سايكەس كەلەدى. ءبىزدىڭ ۇسىنىسىمىزدى ىسكە اسىرۋ جاڭا ورتادا ەكونوميكالىق، وندىرىستىك جانە ساۋدا قۇرىلىمىن جەدەل وزگەرتۋ قاجەتتىلىگىن كورسەتەدى. مەن الەۋەتتى ارتتىرۋ ءۇشىن تاراپتاردى بىرلەسە جۇمىس ىستەۋگە شاقىرامىن»، - دەدى اسقار مامين.

اۆتور: الما مۇقانوۆا