قاتەرلى ىسىككە قارسى كۇرەس كۇنى: استانالىقتار تەگىن كەڭەس الىپ، تەكسەرۋدەن ءوتتى

نۇر- سۇلتان. قازاقپارات - بۇگىن حالىقارالىق قاتەرلى ىسىككە قارسى كۇرەس كۇنى. ايتۋلى كۇن اياسىندا ەلوردا تۇرعىندارى ءۇشىن «اشىق ەسىك» شاراسى ۇيىمداستىرىلدى، دەپ حابارلايدى قازاقپارات ءتىلشىسى.

«نۇر- سۇلتان قالاسىندا 1-4 اقپان ارالىعىندا ونكولوگيالىق اۋرۋلاردىڭ الدىن الۋ جانە ەرتە انىقتاۋ بويىنشا «اشىق ەسىك» كۇنىن وتكىزدىك. جىل سايىن نۇر- سۇلتان قالاسىندا 2 مىڭعا جۋىق جاڭا قاتەرلى ىسىگى بار ناۋقاس تىركەلەدى.

بۇگىنگى تاڭدا ديسپانسەرلىك ەسەپتە 11548 مىڭ ادام تۇر. وتكەن جىلدىڭ قورىتىندىسى بويىنشا ەلوردادا وسىنداي دەرتپەن 1898 ادام تىركەلدى. قاتەرلى ىسىككە شالدىعۋ كورسەتكىشى 2019 -جىلى 100 مىڭ ادامعا شاققاندا 195 تى قۇراسا، 2020 -جىلى 100 مىڭ تۇرعىنعا 164 تى قۇرادى»،-دەدى نۇر- سۇلتان قالاسى كوپسالالى مەديتسينا ورتالىعىنىڭ ديرەكتورى مۇحتار تولەۋتايەۆ اتاۋلى كۇنگە وراي ونلاين وتكەن باسپا ءسوز ءماسليحاتىندا.

ورتالىق باسشىسىنىڭ مالىمدەۋىنشە، اتالعان شارا اياسىندا ەلوردالىقتار قاتەرلى ىسىكتىڭ الدىن الۋ مەن انىقتاۋ باعىتىندا تەكسەرۋدەن ءوتىپ، مامانداردان تەگىن كەڭەس الدى.

بۇعان دەيىن حابارلاعانىمىزداي، ەلوردادا جىل سايىن 2 مىڭعا جۋىق ادام وبىرعا شالدىعاتىنى ءمالىم بولدى.