قازاقستاندىق ۆاكسينانىڭ كلينيكالىق سىناعى ءجىتى باقىلاۋدا - داۋرەن ابايەۆ
«تاياۋدا عانا ەلىمىزدە كوروناۆيرۋسقا قارسى ۆاكسيناتسيا باستالدى. بۇل پروتسەسس حالىقتى يممۋنداۋدى جاقتاۋشىلار مەن وعان قارسىلىق تانىتۋشىلاردىڭ اراسىنداعى تالاس- تارتىسپەن ءوتىپ جاتىر. وكىنىشكە وراي، ۇتىمدى دالەلدەرمەن قاتار داۋلاسۋشىلار ءجيى كەمسىتۋشىلىككە جول بەرىپ جاتادى. مەن ۆاكسيناتسيانى جاقتايمىن. ەكپە جاساتامىن با؟ ءيا، ءسوزسىز. كەزەگىم كەلگەن ساتتە- اق مۇنى جاريا تۇردە جاساۋعا دايىنمىن»، - دەدى ول.
داۋرەن ابايەۆتىڭ قازاقستاندىق ۆاكسينانىڭ كلينيكالىق سىناق ناتيجەلەرى ءجىتى باقىلاۋدا تۇرعاندىعىن اتاپ ءوتتى.
«قازىر ءۇشىنشى كەزەڭى ءوتىپ جاتىر. تيىمدىلىگى جوعارى. كۇردەلى جاناما اسەرلەرى تىركەلگەن جوق. ءبىزدىڭ ۆاكسيناعا يناكتيۆتەلگەن، ياعني ولگەن ۆيرۋس نەگىز بولعان. ول اعزامىزدى قورعايتىن انتيدەنەلەردىڭ تۇزىلۋىنە سەپتىگىن تيگىزەدى. ازىرلەۋشى - بيولوگيالىق قاۋپسىزدىك پروبلەمالارىنىڭ عىلىمي- زەرتتەۋ ينستيتۋتى بارلىق قۇجاتتى دۇنيەجۇزىلىك دەنساۋلىق ساقتاۋ ۇيىمىنا بەرەدى. بۇعان قوسا، ءبىز ەشقايدا دا اسىعىپ وتىرعانىمىز جوق. بارلىعى تىڭعىلىقتى تەكسەرىلەدى. بۇل ىستە اسىعىستىققا جول بەرۋگە بولمايدى»، - دەدى پرەزيدەنت اكىمشىلىگى باسشىسىنىڭ ءبىرىنشى ورىنباسارى.
سونىمەن قاتار ول الەمدەگى وقيعالار وتاندىق ۆاكسيناعا باسىمدىق بەرۋ ستراتەگيالىق دۇرىس شەشىم بولعاندىعىن كورسەتكەنىن اتاپ ءوتتى.
«سەبەبى قاراپايىم - بۇل ۆاكسينانىڭ جەتىسپەۋشىلىگى. بۇگىندە باتىس ەلدەرى ولاردىڭ ەكسپورتىنا شەكتەۋ ەنگىزىپ جاتىر. الەم وزگەرۋدە. اركىم ءوزى ءۇشىن. ونداعان ەل جاھاندىق يممۋنداۋدان تىسقارى قالۋ قاۋپىندە تۇر. بۇل نەنى بىلدىرەدى؟ ەڭ الدىمەن، ولارعا كوروناداعدارىستى ەڭسەرۋ ءۇشىن ۋاقىت ءبىرشاما ۇزاعىراق قاجەت بولادى. ال ولاردىڭ ازاماتتارى جەر شارىنىڭ كوپتەگەن بۇرىشىندا ۇنامسىز قوناققا اينالادى. پرەزيدەنت ايتقانداي، قازاقستاندا ۆاكسيناتسيا مۇلدەم تەگىن. ارينە، ءبىرىنشى كەزەكتە دارىگەرلەر، ينفەكسيالىق اۋرۋحانالاردىڭ قىزمەتكەرلەرى، كوروناۆيرۋسپەن كۇرەستىڭ العى شەبىندە جۇرگەندەر ەكپە الادى»، - دەدى داۋرەن ابايەۆ.
ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى ۆاكسيناتسيا توڭىرەگىندەگى داۋ- دامايعا قاتىستى دا پىكىرىن ءبىلدىرىپ ءوتتى.
«مىنا ءبىر ماڭىزدى تۇسىن اتاپ وتكىم كەلەدى: مەملەكەت ۆاكسيناتسيالاۋعا ەشكىمدى ماجبۇرلەمەيدى. تەك ەرىكتى تۇردە ەكپە جاسالادى. ەلىمىزدە شۇبامەن قاراۋشىلاردىڭ دا بار ەكەندىگىن بىلەمىز. ءبىراق، مۇنداي ءشۇبالانۋشىلاردىڭ اراسىندا تانىمال پىكىرلەردىڭ بولعانىنا قاراماستان مارگينالدى تەوريانى ۇستانۋشىلار تىم از. الەۋمەتتىك ولشەم جەكەلەگەن ازاماتتاردىڭ ۆاكسينانىڭ جەدەل اراداعى وندىرىسىنە بايلانىستى ونىڭ جاناما اسەرلەرىنەن قورقاتىندىعىن كورسەتىپ وتىر. تۇپتەپ كەلگەندە بۇل ادامدار ۆاكسيناتسياعا قارسى ەمەس، ولارعا تەك قوسىمشا كەپىل عانا قاجەت. سوندىقتان دا قازىرگى ۋاقىتتا بارلىق وڭىردە جاۋاپتى مەملەكەتتىك قىزمەتشىلەر ەكپە الىپ جاتىر. جانە دە مۇنى جاريا تۇردە جاساۋدا. بۇل «حايپ» قۋۋ، ۇپاي جيناۋ، اتىن شىعارۋعا دەگەن ۇمتىلىس ەمەس. بۇل تولىقتاي سەنىم احۋالىن قالىپتاستىرۋعا قاراي جاسالعان قادام»، - دەدى ول.
اۆتور: مارلان جيەمباي
