زەينەتاقى جيناعىمەن قالاي ءۇي الۋعا بولادى؟
بۇگىندە 70 پروتسەنتىنىڭ ءوتىنىشى ماقۇلداندى. شامامەن 212 ميلليارد تەڭگە تاياۋ ارادا ازاماتتاردىڭ ارنايى شوتىنا تۇسەدى. كەشە العاشقى 8 مىڭ سالىمشىعا قارجى اۋدارىلدى. زەينەتاقى جيناعىن پايدالانۋعا رۇقسات بەرىلگەلى ءبىراز ادامنىڭ ۇيقىسى قاشتى. العاشقى 3 ساعاتتىڭ وزىندە 4 مىڭنان استام ءوتىنىش تۇسكەن. قازىر نيەتتىلەر سانى 52 مىڭنان اسقان. ءار ءوتىنىشتى مۇقيات زەردەلەگەن ماماندار تۇرعىنداردىڭ قارجىنى قاي ماقساتقا جۇمسايتىنىن دا ايتتى. ازاماتتاردىڭ دەنى قورداعى قاراجاتىن يپوتەكالىق قارىزىن جابۋعا پايدالانباق. بۇل - شامامەن 41 پروتسەنت. باسپانا قۇنىن بىردەن تولەپ، ءۇيلى بولۋدى جوسپارلاعاندار دا جەتەرلىك. ال نەسيەنى قايتا قارجىلاندىرۋ مەن جەر ءۇي قۇرىلىسى، ارەندالىق باسپانانى مەنشىكتەپ الۋعا نيەت بىلدىرگەندەر از. ءوتىنىشى وتپەي قالعاندار دا بار.
جانات قۇرمانوۆ، «ءبىرىڭعاي جيناقتاۋشى زەينەتاقى قورى» ا ق باسقارما ءتوراعاسى:
- ءوتىنىشتى تولتىراردا ەڭ ءجيى كەزدەسەتىن قاتەلىك - رۇقسات ەتىلگەن مولشەردەن كوپ سومانى كورسەتۋ. بۇدان بولەك، ءوتىنىشتىڭ 13 پروتسەنتى قايتالانادى. ياعني سالىمشى العاشقى ءوتىنىمنىڭ مارتەبەسىن كۇتپەستەن بىرنەشە رەت جىبەرگەن. زەينەتاقى قورىندا جيناعى جوق ازاماتتار دا ءوتىنىم بىلدىرگەن.
«وتباسى بانك» وكىلدەرى ءوتىنىشتىڭ قابىلدانباعانى تۋرالى حابارلاما كەلمەسە، قايتالاپ جىبەرۋدىڭ قاجەتى جوق دەيدى. ايتپەسە، قارجىعا قول جەتكىزۋ ۋاقىتى ۇزاپ كەتەدى. الداعى ۋاقىتتا پورتالدا ءوتىنىش ءماتىنىن وزگەرتۋ مۇمكىندىگى پايدا بولادى. ياعني اقشانى قاي ماقساتقا الىپ جاتقانىڭىزدى قايتادان جازا الاسىز. ەل ىشىندەگى ابىر- سابىردى بايقاعان مۇلىك ساتۋشىلارى دا ءۇي باعاسىن اسپانداتىپ جىبەرگەن. مامانداردىڭ سوزىنشە، جاعداي تەك كوكتەم شىعا تۇزەلەدى.
ءلاززات يبراگيموۆا، «وتباسى بانك» ا ق باسقارما ءتورايىمى:
- ەگەر 45 كۇننىڭ ىشىندە ساتىپ العىڭىز كەلگەن ءۇيدى تاۋىپ ۇلگەرمەسەڭىز دە ۋايىمداۋدىڭ قاجەتى جوق. تالاپقا سايكەس، قاراجات زەينەتاقى قورىنداعى شوتىڭىزعا تۇسەدى. ونى الۋ ءۇشىن ءوتىنىشتى قايتا جازاسىز. قارجىنى ۋاقىتىندا پايدالانباعانىڭىز ءۇشىن ەشقانداي ايىپپۇل سالىنبايدى. باسپانانى نارىقتان ەلىمىزدىڭ كەز كەلگەن وڭىرىنەن الۋعا رۇقسات. الايدا ۇلەسكەر رەتىندە ءۇيلى بولۋدى قالاساڭىز، تۇرعىن ءۇي قورىنىڭ كەپىلدىگى بارىنا كوز جەتكىزىڭىز.
ەلوردادا ازىرگە 20 نىسانعا اتالعان قۇجات بەرىلگەن. تۇرعىنداردى تولعاندىرعان تاعى ءبىر ماسەلە - قورداعى اقشانى ءۇي جوندەۋ جۇمىستارىنا جۇمساۋ بولدى.
جانسۇلتان ماتاي، «وتباسى بانك» ا ق ورتالىق فيليالىنىڭ ديرەكتورى:
- تەك جوندەۋ جۇمىستارىنا نەسيە بەرىلمەيدى. ءبىر بانكتىڭ زايم اياسىندا ارلەنبەگەن پاتەردى ساتىپ الىپ، سوعان جوندەۋ جۇمىستارىنىڭ اقشاسىن قوسىپ الۋعا بولادى. ساتىپ العان پاتەرىڭىزدىڭ قۇنى ساتۋشىعا اۋدارىلادى، جوندەۋگە العان اقشاڭىز اعىمداعى ەسەپشوتىڭىزدا قالادى. قۇرىلىس ماتەريالدارىن ءوزىڭىز ساتىپ الاسىز. جوندەۋ جۇمىستارىن جۇرگىزىپ جاتقان ادامدارمەن سول قاراجات ەسەبىنەن ەسەپتەسىز.
ماقۇلدانعان وتىنىشتەردىڭ كوبى الماتى تۇرعىندارىنا تيەسىلى. ماڭعىستاۋ مەن ەل استاناسىندا دا بەلسەندىلىك بايقالادى. ايتپاقشى، نەسيە تاريحىنىڭ ناشار بولۋى زەينەتاقى قورىنداعى اقشانى الۋعا كەدەرگى ەمەس. جاۋاپتىلار وسىلاي دەپ سەندىردى.
