تالدىقورعاندا كوپبالالى انالار جۇمىس ىستەيتىن تىگىن سەحى اشىلادى
بۇل تۋرالى وبلىس باسشىسىنىڭ «اسىل انالار» قوعامدىق قورىنىڭ وكىلدەرىن قابىلداۋى كەزىندە ايتىلدى، دەپ حابارلايدى قازاقپارات ءتىلشىسى.
وعان قاجەتتى عيمارات تابۋ، تىگىن ماشيناسى جانە باسقا دا قاجەتتى قۇرال- جابدىقتار ساتىپ اپەرۋ، تاپسىرىسپەن جۇمىس ىستەۋىنە قولعابىس ەتۋ سياقتى بارلىق ءىس- شارالارعا وبلىس اكىمى اماندىق باتالوۆ تولىققاندى كومەك كورسەتەدى. اماندىق باتالوۆتىڭ قابىلداۋىنا كەلگەن تالشىن تۋكتىنوۆا ەكى بالا تاربيەلەپ وتىرعان جالعىزباستى انا، ال ايگەرىم جولامانوۆانىڭ مۇگەدەك بالاسى بار. تۇرمىس تاۋقىمەتىن ءبىر كىسىدەي كورگەن انالار كومەك سۇراپ اكىمدىككە بۇعان دەيىن دە كەلگەن. قالا اكىمدىگىنىڭ كەڭەسىمەن «اسىل انالار» قوعامدىق قورىن قۇرىپ، وزدەرى باس بولىپ كومەككە مۇقتاج انالاردى قاتارلارىنا تارتقان. وتكەن جىلدىڭ قاراشا ايىنان بەرى ءوز جۇمىسىن باستاعان قور قازىر 300 دەن استام انالارمەن قارىم- قاتىناستا.
«ءبىز بۇگىنگە دەيىن دەمەۋشىلەردىڭ كومەگىمەن 100 گە جۋىق وتباسىعا كومىر- وتىن، ازىق- تۇلىك، كيىم- كەشەك جاعىنان كومەك كورسەتتىك. بۇل جۇمىستى ودان ءارى دە جالعاستىرا بەرەمىز. دەگەنمەن ءبىزدىڭ كوپ بالالى انالارىمىزدىڭ قولىنان كەلمەيتىن ءىس جوق، شەتىنەن ونەرلى. سوندىقتان ءبىز «قاشانعى كومەك سۇراپ ءومىر سۇرەمىز. قولىمىزدان كەلەتىن ءبىر ءىس باستاپ، انالاردى دا سول شارۋاعا تارتايىق» دەپ اقىلداسقاندا، ءاربىر ايەل ءوزىنىڭ قولىنان كەلەتىن ونەرىن ورتاعا سالدى. سودان ءبىز اقىلداسا كەلە تىگىن سەحىن اشساق دەگەن قورىتىندىعا كەلدىك. وسى جاعىنان بىزگە قولداۋ بىلدىرسەڭىزدەر»، - دەدى تالشىن تۋكتىنوۆا.
ال ايگەرىم جولامانوۆا اكىمدىككە كومەك سۇراپ كەلگەننەن كەيىن جولداسى «اتامەكەن» كاسىپكەرلەر وداعى ارقىلى جاڭا ماماندىققا وقىپ، 550 مىڭ تەڭگە گرانت ۇتىپ العان. «قازىر اۆتوكولىكتەرگە تەحنيكالىق قىزمەت كورسەتەتىن ورىن اشۋعا نيەتتىپ جاتىرمىز»، - دەدى ول.
سول سياقتى بۇرىن تۇراقتى تابىسى جوقتىقتان مەملەكەتتىك باعدارلامامەن ءۇي الۋعا مۇمكىندىگى بولماعان وتباسى قازىر «باقىتتى وتباسى» باعدارلاماسى ارقىلى باسپاناعا قول جەتكىزگەن.
«قانداي قيىندىق كورسەم دە مويىماي، العا قويعان ماقساتتارىما بىرتە- بىرتە قول جەتكىزىپ كەلە جاتقان مەنىڭ جەكە تاجىريبەم كوپتەگەن انالاردىڭ ءۇمىتىن وياتتى. مەملەكەت تاراپىنان كورسەتىلەتىن قولداۋلارعا قول جەتكىزۋ جاعىنان كەڭەس سۇراپ، جول كورسەتۋىمدى ءوتىنىپ جاتادى. مۇمكىندىگىنشە مەملەكەتتىك قولداۋ شارالارىن الۋعا باعىت- باعدار كورسەتىپ ءجۇرمىن»، - دەدى ا. جولامانوۆا.
وبلىس اكىمى انالاردىڭ وسىنداي ۇسىنىستارى بويىنشا قابىلداسا دەپ سۇراعانىن ەستىگەندە قۋانعانىن ايتتى.
«سىزدەردىڭ باستامالارىڭىزعا، ءىس باستاساق دەگەن تالپىنىستارىڭىزعا ريزا بولىپ وتىرمىن. مەملەكەت تاراپىنان ءبىز كوپ بالالى انالارعا، از قامتىلعان وتباسىلارىنا ءارقاشان قولداۋ كورسەتىپ كەلەمىز. تىگىن سەحىن اشساق دەگەن نيەتتەرىڭىزگە ءبىز بارلىق جاعىنان جاردەم جاسايمىز. ەڭ الدىمەن قالادا بوس تۇرعان عيمارات بار ما، سول جاعىن قاراستىرۋىمىز كەرەك. سودان كەيىن «جەتىسۋ» الەۋمەتتىك- كاسىپكەرلىك كورپوراتسياسى ارقىلى تىگىن ماشينالارىن، باسقا دا قاجەتتى قۇرال- جابدىقتاردى الىپ بەرەمىز. كەيىن سەحتىڭ ونىمدەرىنە تاپسىرىس بەرەتىن مەكەمەلەرمەن جۇمىستى ۇيلەستىرۋگە دە قولعابىس جاسايمىز. ەڭ باستىسى، - ويعا العان ىستەرىڭىزدى باستاۋ. ءبىر باستالعاننان كەيىن بىرتە- بىرتە ىرگەسىن كەڭەيتىپ، قاتارلارىڭىزدى كوپ بالالى انالارمەن تولىقتىرا بەرەسىزدەر. قاجەت بولسا، جۇمىسپەن قامتۋ ورتالىقتارى ارقىلى دا ماماندار الۋلارىڭىزعا بولادى»، - دەگەن اماندىق باتالوۆ ورىنباسارى باتىرجان بايجۇمانوۆقا، «جەتىسۋ» اكك باسشىسى رۋسلان قوجاسبايەۆقا، جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى مارجان مۇراتقا، تالدىقورعان قالاسى اكىمىنىڭ ورىنباسارى ساۋلە ارزانبەكوۆعا وسى ءىستى ەرەكشە نازارعا الىپ، ءتيىستى ماسەلەلەردىڭ بارلىعىن شەشۋدى تاپسىردى.
