قازاقستان تاريحى مەن دۇنيەجۇزى تاريحى بويىنشا ءبىرىڭعاي وقۋلىق ازىرلەۋ جۇمىسى باستالدى - مينيستر
بۇل تۋرالى ۇكىمەت وتىرىسىندا ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ تاپسىرمالارىن ورىنداۋ بويىنشا جۇمىس جۇيەلى تۇردە جۇرگىزىلىپ جاتىر. بالاباقشالاردى دامىتۋ بويىنشا كەشەندى جوسپار ازىرلەندى. وندا ۆاۋچەرلىك جۇيەنى ەنگىزۋ، بالاباقشالارمەن قامتۋ، جاڭا مەملەكەتتىك ستاندارت قابىلداۋ جانە بالاباقشالاردا قولايلى جاعداي جاساۋ شارالارى قاراستىرىلادى. مەملەكەت باسشىسى تاپسىرعان سۋمەن جابدىقتاۋ، ىستىق سۋمەن قامتاماسىز ەتۋ، كارىز ماسەلەلەرى بويىنشا جاعداي سلايدتا كورسەتىلگەن. اسىرەسە، تۇركىستان، قوستاناي، شىعىس، سولتۇستىك، باتىس قازاقستان، اقمولا جانە اقمولا وبلىستارىندا بۇل پروبلەما وزەكتى. ماسەلە بەكىتىلگەن مەرزىمدە شەشىلۋى كەرەك»، - دەدى مينيستر.
ونىڭ ايتۋىنشا، ينكليۋزيۆتى ءبىلىمدى دامىتۋعا سايكەس، ەرەكشە بالالارعا ارنالعان ۇيىمداردىڭ اشىلۋ ءنورماتيۆى 50 مىڭ بالاعا ءبىر پسيحولوگيالىق-مەديتسينالىق، پەداگوگيكالىق كەڭەس ەسەبىنەن وزگەرتۋ جوسپارلانادى. سوندىقتان قوسىمشا 46 پ م ك جانە 25 تۇزەتۋ كابينەتتەرىن قۇرۋ قاجەت.
«بۇل ەرەكشە بالالار ءۇشىن اۋاداي قاجەت شارا. بۇگىندە پ م ك- عا ەڭ ۇلكەن قاجەتتىلىك تۇركىستان، الماتى، قاراعاندى، اتىراۋ وبلىستارىندا جانە نۇر-سۇلتان قالالارىندا. ەرەكشە قاجەتتىلىگى بار بالالارعا مەملەكەتتىك ءبىلىم بەرۋ تاپسىرىسىن ورنالاستىرۋ تەتىگىن قولعا الامىز. ورتا بىلىمدە وقۋ جۇكتەمەسىن ازايتۋ ماسەلەسى قارالادى. ۇلگىلىك وقۋ باعدارلامالارى جاڭارتىلادى»، - دەدى اسحات ايماعامبەتوۆ.
سونىمەن قاتار ول پرەزيدەنت تاپسىرماسىنا سايكەس، ماتەماتيكا، تىلدەر جانە ينفورماتيكا پاندەرىنە ەرەكشە نازار اۋدارىلاتىندىعىن ايتتى.
«جانە دە قازاقستان تاريحى مەن دۇنيەجۇزى تاريحى بويىنشا ءبىرىڭعاي وقۋلىقتاردى ازىرلەۋ جانە ەنگىزۋ ءۇشىن ءتيىستى جۇمىستاردى باستادىق»، - دەدى ول.
