بەيبىت اتامقۇلوۆ تۇرعىن ءۇي قۇرىلىسىن دامىتۋدىڭ جاڭا تەتىكتەرىن اتادى

نۇر-سۇلتان. قازاقپارات - «5-10-20» جوباسىن جالعاستىرۋعا جىل سايىن420 ميلليارد تەڭگە قاجەت.

بۇل تۋرالى ۇكىمەت وتىرىسىندا ق ر يندۋستريا جانە ينفراقۇرىلىمدىق دامۋى ءمينيسترى بەيبىت اتامقۇلوۆ ايتتى، دەپ حابارلايدى قازاقپارات ءتىلشىسى.

«جالعا بەرىلەتىن تۇرعىن ءۇي قۇرىلىسىنا جەكە ينۆەستيتسيالاردى تارتا وتىرىپ، تۇرعىن ءۇي قۇرىلىسىنىڭ جاڭا تەتىگى ازىرلەنەدى. سونىمەن قاتار، كرەديتتىك تۇرعىن ءۇي قۇرىلىسى كولەمىن ۇلعايتۋ جانە «5-10-20» جوباسىن جالعاستىرۋ ۇسىنىلادى»، - دەدى مينيستر.

ونىڭ اتاپ وتۋىنشە، ول ءۇشىن جىل سايىن 420 ميلليارد تەڭگە قاجەت. ياعني بۇل ماقساتقا 7 جىل ىشىندە 2,9 تريلليون تەڭگە قاجەت بولادى.

«بۇل جىل سايىن تىركەلگەن باعامەن 35 مىڭ پاتەر سالۋعا مۇمكىندىك بەرەدى. وسى تەتىك ارقىلى كەزەكتە تۇرعان 353 مىڭ ادام قولداۋعا يە بولادى»، - دەدى بەيبىت اتامقۇلوۆ.