قازاقستاننىڭ باس سانيتارى ۆاكسينا العاننان كەيىنگى حال-جاعدايىن ايتتى

نۇر-سۇلتان. قازاقپارات - ق ر دەنساۋلىق ساقتاۋ ۆيتسە-ءمينيسترى - باس مەملەكەتتىك سانيتار دارىگەر ەرلان قياسوۆ ۆاكسينا سالدىردى جانە ەگۋدەن كەيىنگى حال-جاعدايىن ايتتى، دەپ حابارلايدى قازاقپارات ءتىلشىسى.

«ەشقانداي قولايسىزدىق سەزىپ تۇرعان جوقپىن. ەڭ الدىمەن ۆاكسينا الاتىن ادامدى دارىگەر تەكسەرەدى، انامنەز الىنادى. دەنە قىزۋى، قان قىسىمى، جۇتقىنشاق تەكسەرىلەدى. سودان كەيىن دارىگەر ول ادامعا ۆاكسينا سالۋعا رۇقسات بەرەدى. پاتسيەنت ەرىكتى تۇردە ۆاكسينا الاتىنى تۋرالى اقپاراتتىق كەلىسىمگە قول قويادى. ەگەر ول بارلىق پروتسەدۋرالارمەن كەلىسسە، 21 كۇننەن كەيىن ۆاكسينانىڭ ەكىنشى كەزەڭىنە دە كەلۋى كەرەك»، - دەدى ەرلان قياسوۆ 6№ قالالىق ەمحانادا تىلشىلەرگە بەرگەن سۇحباتىندا.

ونىڭ ايتۋىنشا، بارلىق كەزەڭدە بارلىق جاۋاپكەرشىلىك ەمدەۋ مەكەمەلەرىنە جۇكتەلەدى.

«بارلىق جاۋاپكەرشىلىك ورتاق بولادى. ارينە، دەنساۋلىق ساقتاۋ مينيسترلىگى ءار جاعدايدى دەربەس قاراستىرادى. ءاربىر وڭىرلىك دەنساۋلىق ساقتاۋ باسقارماسىنىڭ جانىنان ايرىقشا رەاكسيا سەكىلدى جاعدايلاردى تەكسەرەتىن ارنايى كوميسسيالار قۇرىلادى»، - دەپ ءتۇسىندىردى باس سانيتار دارىگەر.

ايتا كەتەيىك، بۇگىن قازاقستاندا كوروناۆيرۋس ينفەكتسياسىن جۇقتىرۋ جانە تاراتۋ تاۋەكەلى جوعارى ساناتتاردى كوروناۆيرۋسقا قارسى ۆاكسينالاۋ باستالدى. قازاقستاندا ۆاكسينا ەرىكتى تۇردە سالىنادى.

ەلورداداعى 6№ قالالىق ەمحانادا ق ر دەنساۋلىق ساقتاۋ ۆيتسە-ءمينيسترى - باس مەملەكەتتىك سانيتار دارىگەر ەرلان قياسوۆ پەن دەنساۋلىق ساقتاۋ ۆيتسە-ءمينيسترى اجار عينيات كوروناۆيرۋسقا قارسى ۆاكسينا سالدىردى.