دەنساۋلىق ساقتاۋ ۆيتسە-مينيسترلەرى كوروناۆيرۋسقا قارسى ۆاكسينا سالدىردى
ۆيتسە-مينيسترلەرگە رەسەيلىك Sputnik V ۆاكتسيناسى ەگىلدى. ەگۋدەن بۇرىن ولار تەكسەرۋدەن ءوتتى جانە جارتى ساعات ءوتۋىن كۇتتى.
«مەن ۇنەمى ۆاكسينا الامىن. بۇل - ەڭ ءتيىمدى قورعانىس قۇرالى، سوندىقتان ۆاكسيناعا قول جەتكىزگەن العاشقى ەلدەردىڭ ءبىرى بولعانىمىزعا قۋانۋىمىز كەرەك. جەكە ءوزىم ۆاكسينا ارقىلى مەديتسينا ماماندارىن، تۇتاس حالىقتى قورعاي الاتىنىمىزعا قۋاندىم. رەسەيلىك، قازاقستاندىق ۆاكسينالارعا كەلسەك، بارلىق ۆاكسينانىڭ قورىتىندىسى ءبىر - اعزادا كوروناۆيرۋس ينفەكسياسىنا قارسى يممۋنيتەت/انتيدەنەلەر پايدا بولادى. ۆاكسينا سالاردا دا ەش ۋايىمداعان جوقپىن. ويتكەنى مەن دارىگەرمىن جانە ۆاكسينالىق پرەپاراتتاردىڭ ارتىقشىلىقتارى مەن كەرى اسەرلەرىنەن حاباردارمىن»، - دەدى اجار عينيات تىلشىلەرگە بەرگەن سۇحباتىندا.
ايتا كەتەيىك، بۇگىن قازاقستاندا كوروناۆيرۋس ينفەكسياسىن جۇقتىرۋ جانە تاراتۋ تاۋەكەلى جوعارى ساناتتاردى كوروناۆيرۋسقا قارسى ۆاكسينالاۋ باستالدى. قازاقستاندا ۆاكسينا ەرىكتى تۇردە سالىنادى.
ودان كەيىن 15- اقپاننان باستاپ، ۆاكتسينالاۋ پروتسەسىنە قاراعاندى فارماتسيەۆتيكالىق كەشەنىنىڭ بازاسىندا وندىرىلگەن گام-كوۆيد-ۆاك ۆاكسيناسى قوسىلادى.
ال 2021-جىلدىڭ 2- توقسانىنان باستاپ ۆاكتسينالاۋ پروتسەسىنە قازاقستاندىق - QazCovid-In پرەپاراتىن قوسۋ جوسپارلانىپ وتىر. بۇل ۆاكسينا قازىرگى ۋاقىتتا كلينيكالىق سىناقتىڭ 3-كەزەڭىنەن وتۋدە. 31- قاڭتاردا قاراعاندى فارماتسيەۆتيكالىق كەشەنى ەلگە «سپۋتنيك V» ۆاكتسينالارىنىڭ العاشقى پارتياسىن جەتكىزدى.
