الماتىلىق جىگىت نيۋ- يوركتە قازاق راديوسىن اشتى
وسى ورايدا ا ق ش- تا «Qazaq time» راديوسى قالاي پايدا بولعانى تۋرالى قازاقپارات تىلشىسىنە ونىڭ نەگىزىن قالاۋشى ءارى راديو جۇرگىزۋشىسى دانيار قوجان ايتىپ بەردى.
جەرلەسىمىز دانيار قوجان - الماتىنىڭ تۋماسى. ول قالاداعى قازاق گۋمانيتارلىق زاڭ ۋنيۆەرسيتەتىن «قۇقىقتانۋ» ماماندىعى بويىنشا ءتامامداعان. نيۋ- يوركتە تۇرىپ، جۇمىس ىستەپ جاتقانىنا 3 جىلدان اسقان. وندا دانيار ادۆوكاتتىڭ PR مەنەدجەرى بولىپ قىزمەت ەتەدى. سونداي- اق، وتانداسىمىز ا ق ش- تا قازاق مادەنيەتىنىڭ وركەندەۋىنە ۇلەس قوسىپ ءجۇر. نيۋ- يوركتەگى «Qazaq time» راديوسى ساناۋلى كۇن بۇرىن عانا العاش ەفيرگە شىقتى.
قازاقستاننىڭ نيۋ- يوركتەگى باس كونسۋلى المات ايداربەكوۆ، «جۇلدىز fm « راديوسىنداعى ارىپتەستەر جانە نيۋ- يوركتەگى قازاق پوليتسەيى ديماش نيازوۆ ونىڭ باعدارلاماسىنا قوناق بولعان.
«قازىرگى زاماندا راديونىڭ ءرولى بۇرىنعىداي ءالى دە زور. ول تىڭدارماندارىن جوعالتقان جوق جانە قارقىندى دامۋشى ب ا ق بولىپ وتىر. امەريكادا قازاق راديوسى ەفيرىن تاراتۋدى قولعا الدىم. سىرت جەردە بىزگە قازاقستان جەتىسپەيدى. وسى ورايدا قازاق راديوسىن اشۋ تاڭداۋىن جاسادىم. مەن قازاق حالقىنىڭ ءۇنىن بۇكىل ا ق ش- قا جەتكىزگىم كەلەدى. وسىلايشا انا ءتىلىمىزدىڭ دامۋىنا ءوز ۇلەسىمدى قوسقىم كەلەدى»، - دەدى دانيار قوجان.
ونىڭ ايتۋىنشا، نيۋ- يوركتەگى «Freedom FM» ورىس ءتىلدى راديوسىنىڭ كۇندەلىكتى 2 ساعاتى ەلىمىزدە بولىپ جاتقان سوڭعى جاڭالىقتار مەن قازاق اۋەندەرىنە ارنالادى. سونداي- اق، امەريكا تورىندە اشىلعان العاش قازاق راديوسىنىڭ شىمىلدىعى الەمگە تانىمال ءانشى، جەرلەسىمىز ديماش قۇدايبەرگەننىڭ انىمەن اشىلعان. ودان بولەك، جەرلەسىمىزدىڭ مالىمدەۋىنشە، راديو جەلىسىندە شەتەلدە ونىڭ ىشىندە ا ق ش- تا تۇرىپ جاتقان قانداستارىمىزدىڭ ءومىرى تۋرالى ايتىلادى. سونىمەن قاتار تۋعان جەرگە قاتىستى تاڭعاجايىپ دۇنيەلەر تۋرالى سىر شەرتىلەدى. تىڭدارماندارمەن كەرىس بايلانىس ورناتۋ ماقساتىندا «سۇراق- جاۋاپ» ايدارى بار. وندا راديو تىڭداۋشىلار وزدەرىن قىزىقتىرعان ساۋالداردى ەفير قوناقتارى مەن جۇرگىزۋشىسىنە جولداي الادى.
«مەنىڭ ماقساتىم - ءوز وتانىمدى امەريكاعا تانىستىرۋ. جانە وسىندا تۇرىپ جاتقان قانداستارىمىزعا وتاننىڭ ءدامىن سەزگىزۋ. مەن ەلىمىزدىڭ باي تاريحى تۋرالى ايتقىم كەلەدى. باقىتتى بالالىق شاعىم، ۇلتارالىق دوستىق جانە قوناقجاي ءۇشىن قازاقستانعا العىسىم شەكسىز. مەن ۇلتتىق مادەنيەتىمىزدى، ادەت- عۇرىپ پەن سالت- ءداستۇرىمىزدى ا ق ش- تا كەڭىنەن ناسيحاتتاۋعا تىرىسامىن»، - دەيدى ول.
