قايرات كەلىمبەتوۆ: پرەزيدەنت وتە شۇعىل شەشىم قابىلداي الاتىن جاڭا ينستيتۋت قۇرۋ توقتامىنا كەلدى

نۇر- سۇلتان. قازاقپارات - پاندەميا كەزىندە مەملەكەتتىك جۇيە ءۇشىن ساياسي شەشىمدى شۇعىل قابىلداۋ - ۇلكەن سىنعا اينالدى.

ستراتەگيالىق جوسپارلاۋ جانە رەفورمالار اگەنتتىگىنىڭ ءتوراعاسى قايرات كەلىمبەتوۆ رەفورمالار جونىندەگى جوعارى كەڭەستىڭ ءۇشىنشى وتىرىسى جونىندە وسىنداي پىكىر ءبىلدىردى، دەپ حابارلايدى قازاقپارات ءتىلشىسى.

«پاندەميا ەكونوميكاعا قوس تاراپتان سالقىنىن تيگىزدى. ءبىر جاعىنان جاھاندىق ەكونوميكانىڭ قارقىنى باسەڭدەدى. 2020 -جىلى قاتەلەسپەسەم الەمدىك جالپى ىشكى ءونىم 4 پايىزعا تومەندەدى. ەكىنشى جاعىنان شەكتەۋ شارالارى مەملەكەتتەردىڭ بيۋدجەتىنە، كىرىسىنىڭ ازايىپ، شىعىسىنىڭ ۇلعايۋىنا اسەر ەتتى. پاندەميا سونىمەن قاتار دەنساۋلىق ساقتاۋ جانە ءبىلىم بەرۋ جۇيەسىن سترەسس- تەستتەن وتكىزگەنىن بىلەسىزدەر. وسىنىڭ ءبارى قازاقستان ۇكىمەتىنە داعدارىسقا قارسى ءتيىستى شارالاردى ەنگىزۋگە ءماجبۇر ەتتى»، - دەدى قايرات كەلىمبەتوۆ ساراپشى راحىم وشاقبايەۆپەن «حابار 24» ارناسىندا جۇرگىزگەن سۇحباتىندا.

ونىڭ ايتۋىنشا، ۇكىمەت داعدارىسقا قارسى شارالاردىڭ باسىم بولىگىن دەنساۋلىق ساقتاۋ جۇيەسىنە باعىتتادى. ەكىنشى جاعىنان كاسىپكەرلىك سالاسىنا وراسان زور قولداۋ قاجەت بولدى. سەبەبى ءارتۇرلى سەبەپكە بايلانىستى ءبىراز ادام تۇراقتى تابىسىنان ايىرىلدى.

«مەملەكەت بۇل تۇرعىدا كاسىپكەرلەرگە كومەكتەستى. مىسال رەتىندە ايتارىم: 4,5 ميلليوننان استام ادامعا ايىنا 42500 تەڭگەلىك الەۋمەتتىك تولەمدى بەرۋ ءۇشىن 450 ميلليارد تەڭگە جۇمسالدى. مۇنداي كومەكتى پوستكەڭەستىك ەلدەردىڭ ىشىندە حالقىنا قازاقستان عانا كورسەتكەنىن اتاپ ءوتۋ كەرەك. وسىنىڭ ءبارى دە كەيىنگى 30 جىلدىڭ ىشىندە جولعا قويىلعان ەكونوميكالىق ساياساتتىڭ ارقاسىندا مۇمكىن بولدى. تۇڭعىش پرەزيدەنت - ەلباسى باستاعان رەفورمالاردىڭ ارقاسىندا ارقاسۇيەر قور قالىپتاسقانىن پرەزيدەنت تە ءوز جولداۋىندا اتاپ ءوتتى»، - دەدى ول.

دەگەنمەن قايرات كەلىمبەتوۆ پاندەميانىڭ سىن- تەگەۋرىندەرىنە تولىققاندى جاۋاپتى وسى شارالارمەن عانا بەرۋ كۇردەلىرەك ەكەنىن اتاپ ءوتتى.

«جاھاندىق ترەندتەر قاتتى وزگەرىسكە ۇشىراۋدا. پاندەميانىڭ ىقپالى مەن شەكارالاردىڭ جابىلۋى، ەكونوميكالىق ءوسىم قارقىنىنىڭ تومەندەۋى - بيۋدجەتكە دە، ۇكىمەتتىڭ مۇمكىندىكتەرىنە دە اۋىر جۇكتەمە ءتۇسىردى. سول سەبەپتى مەملەكەت باسشىسى بيلىك تۇتاس ارەكەتتەسە وتىرىپ، قانداي دا ءبىر زاڭنامالىق وتە شۇعىل شەشىمدەردى قابىلدايتىن، جەدەل قاراجات بولە الاتىن جاڭا ينستيتۋتتىڭ كەرەكتىگى جونىندە توقتامعا كەلدى. ونىڭ باسىندا رەفورمالار جونىندەگى جوعارى كەڭەس تۇرادى. ونىڭ قۇرامىندا ۇكىمەتتىڭ، «اتامەكەن» پالاتاسىنىڭ، پرەزيدەنت اكىمشىلىگىنىڭ وكىلدەرى بار. ولار وتە ماڭىزدى ساياسي شەشىمدەردى قابىلداي الادى. بۇل شەشىمدەردى مەملەكەت باسشىسى بەكىتەدى. مەملەكەتتىك جۇيە ءۇشىن ساياسي شەشىمدى شۇعىل قابىلداۋ - ەرەكشە سىن- تەگەۋرىن بولدى. شەشىمدى قابىلداۋمەن قاتار سول رەفورمالاردىڭ پارلامەنتتە جەدەل ءجۇرۋىن قاداعالايتىن وسىنداي ينستيتۋت كەرەك بولدى»، - دەدى ول.

ەسكە سالا كەتسەك، بۇگىن اقوردادا مەملەكەت باسشىسى قاسىم- جومارت توقايەۆتىڭ توراعالىعىمەن رەفورمالار جونىندەگى جوعارى كەڭەستىڭ ءۇشىنشى وتىرىسى وتكەن بولاتىن. جيىندا قازاقستان رەسپۋبليكاسىنىڭ 2025 -جىلعا دەيىنگى ۇلتتىق دامۋ جوسپارىن ازىرلەۋ، مەملەكەتتىك جوسپارلاۋدىڭ جاڭا جۇيەسى، مەملەكەتتىك باسقارۋدى دامىتۋدىڭ 2030 -جىلعا دەيىنگى تۇجىرىمداماسى، 2021-2025 -جىلدارعا ارنالعان جەكەشەلەندىرۋ جوسپارىنىڭ جوباسى، سونداي- اق، جەدەل رەفورمالار پاكەتى جانە ۇلتتىق حالىق ساناعىن وتكىزۋ ماسەلەلەرى قاراستىرىلدى. وتىرىستا پرەزيدەنت مەملەكەتتىك باسقارۋدى دامىتۋ ءۇشىن ءىس- قيمىلدار جوسپارىن قابىلداۋدى تاپسىردى.