كوروناۆيرۋس: قازاقستاندىقتاردى ۆاكسيناتسيالاۋعا قاتىستى قاۋلى شىقتى

نۇر- سۇلتان. قازاقپارات - ق ر دەنساۋلىق ساقتاۋ ۆيتسە- ءمينيسترى - باس مەملەكەتتىك سانيتار دارىگەرى ەرلان قياسوۆتىڭ قاۋلىسىمەن ەل تۇرعىندارىن كوروناۆيرۋسقا قارسى ۆاكسيناتسيالاۋ بويىنشا قاۋلى بەكىتىلدى، دەپ حابارلايدى قازاقپارات ءتىلشىسى.

اتالعان قاۋلىعا سايكەس، ءبىرىنشى كەزەكتە كوروناۆيرۋس جۇقتىرىپ الۋ قاۋپى جوعارى ساناتقا كىرەتىن ادامدارعا ۆاكسيناتسيا سالىنادى. ولار:

- مەديتسينا قىزمەتكەرلەرى، ءبىرىنشى كەزەكتە ينفەكسيالىق اۋرۋحانالار، جەدەل مەديتسينالىق كومەك، رەانيماتسيا جانە تەراپيا بولىمشەلەرى، العاشقى مەديتسينالىق- سانيتارلىق كومەك كورسەتەتىن دەنساۋلىق ساقتاۋ ۇيىمدارى، ستاتسيونارلىق كومەك كورسەتەتىن دەنساۋلىق ساقتاۋ ۇيىمدارىنىڭ قابىلداۋ بولىمدەرى پەرسونالدارى، سانيتارلىق- ەپيدەميولوگيالىق قىزمەت ماماندارى؛

- پەداگوگتەر؛

- ۋچاسكەلىك پوليتسيا قىزمەتكەرلەرى؛

- ستۋدەنتتەر؛

- مەديتسينالىق- الەۋمەتتىك جانە جابىق بالالار مەكەمەلەرىنىڭ قىزمەتكەرلەرى مەن كونتينگەنتى؛

- توتەنشە جاعداي قىزمەتتەرىنىڭ، قورعانىس، ىشكى ىستەر مينيسترلىكتەرىنىڭ، ۇلتتىق قاۋىپسىزدىك كوميتەتىنىڭ، ق ر مەملەكەتتىك كۇزەت قىزمەتىنىڭ قىزمەتكەرلەرى؛

- ق ر پرەزيدەنتى ءىس باسقارماسىنىڭ كونتينگەنتى، مەملەكەتتىك قىزمەتشىلەر، قازاقستاندا تىركەلگەن ديپلوماتيالىق، كونسۋلدىق مەكەمەلەردىڭ قىزمەتكەرى سانالاتىن ق ر ازاماتتارى، ۇلتتىق قۇراما كوماندالاردىڭ مۇشەلەرى؛

سوزىلمالى اۋرۋلارى بار (قانت ديابەتى، سوزىلمالى وبسترۋكتيۆتى وكپە اۋرۋى، جۇرەك- قان تامىرى جۇيەسىنىڭ سىرقاتى) تۇلعالار. ال الدىن الۋ ەكپەلەرىنە تۇراقتى جانە ۋاقىتشا مەديتسينالىق قارسى كورسەتىلىمى بار ادامدارعا، ك ۆ ي- ءدىڭ وتكىر جانە سيمپتومسىز تۇرىمەن اۋىرعاندارعا ۆاكسيناتسيا سالىنبايدى.

كوروناۆيرۋسپەن اۋىرعاندارمەن قارىم- قاتىناستا بولعاندارعا كارانتين مەرزىمى وتكەننەن كەيىن عانا ەكپە سالىنادى. قاۋلىدا سونداي- اق ۆاكسينانى سالدىرۋعا قارسى كورسەتىلىمدەر بەلگىلەنگەن.

ەسكە سالايىق، قازاقستاندا گام- كوۆيد- ۆاك (سپۋتنيك V) رەسەيلىك ۆاكسيناسىمەن ەگۋ 1 - اقپاندا باستالادى.

اۆتور: مارلان جيەمباي