اسقار مامين: ۇكىمەت پارلامەنتپەن ۇيلەسىمدى جۇمىس ىستەيدى
«ەڭ الدىمەن ماعان كورسەتكەن سەنىمدەرىڭىزگە العىس ايتامىن. بۇل مەن ءۇشىن زور مارتەبە جانە ۇلكەن جاۋاپكەرشىلىك. الدىمىزدا قازاقستاننىڭ تۇراقتى الەۋمەتتىك- ەكونوميكالىق دامۋى بويىنشا ۇلكەن ماقسات- مىندەتتەر قويىلعان. بۇگىن مەملەكەت باسشىسى قاسىم- جومارت توقايەۆ ەلىمىزدىڭ دامۋىنىڭ باسىم باعىتتارىن جاريالادى. سونىڭ ىشىندە ەڭ باستىسى - حالىقتىڭ تابىسىن ارتتىرۋ»، - دەدى ءماجىلىستىڭ جالپى وتىرىسىندا دەپۋتاتتاردىڭ كەلىسىمىمەن ۇكىمەت باسشىسى لاۋازىمىنا قايتا تاعايىندالعان اسقار مامين.
ۇكىمەت باسشىسى بۇل مىندەتتەردى ەكونوميكانى قارقىندى دامىتۋ ارقىلى ورىنداۋعا بولاتىندىعىن ايتتى.
«وسى ماقساتتا ەكونوميكانىڭ باسەكەگە قابىلەتتىلىگىن ارتتىرۋ، ينۆەستيتسيالار تارتۋ، جاڭا تەحنولوگيالاردى ەنگىزۋ، جاڭا جۇمىس ورىندارىن قۇرۋ جانە تاعى دا باسقا باعىتتار بويىنشا ءتيىمدى شارالار ىسكە اسىرىلادى. وسى ستراتەگيالىق مىندەتتەردى ىسكە اسىرۋدا ۇكىمەت پارلامەنتپەن بىرگە ۇيلەسىمدى ءارى ناتيجەلى جۇمىس ىستەيتىن بولادى»، - دەدى اسقار مامين.
اۆتور: مارلان جيەمباي