كوروناۆيۋستان ءولىم-ءجىتىم كۇرت ارتتى
قازاقپارات الەمدەگى ەپيدەميولوگيالىق احۋال جونىندە كوروناۆيرۋستىڭ تارالۋىنا جول بەرمەۋ جونىندەگى ق ر ۇكىمەتى جانىنداعى ۆەدومستۆوارالىق كوميسسيانىڭ اقپاراتىنا سىلتەمە جاساپ حابارلايدى.
گەرمانيا مەديتسينا ماماندارىنىڭ پايىمىنشا، كوروناۆيرۋس بويىنشا احۋالدىڭ الداعى جاقىن ۋاقىتتا جاقسارۋىن كۇتۋدىڭ قاجەتى جوق.
ەلدە قاڭتار ايىنىڭ سوڭىنا دەيىن قاتاڭ كارانتين ەنگىزىلگەن. ءبىراق ەل بيلىگى «مەگا- لوكداۋن» ەنگىزۋدى دە قاراستىرۋدا. ول جاعدايدا قوعامدىق كولىك تولىق توقتايتىن بولادى.
فرانسيادا قوعامدىق كولىكتەر جۇمىس ىستەيدى جانە دۇكەندەر دە اشىلدى، ءبىراق كومەندانتتىق ساعات كۇشەيتىلدى: ەندى كەشكى ساعات 6 دان كەيىن سەبەپسىز كوشەگە شىعۋعا بولمايدى (بۇعان دەيىن تىيىم 20:00-دەن باستالعان بولاتىن).
يسپانيادا 100 مىڭ تۇرعىنعا شاققاندا كوروناۆيرۋستى جۇقتىرۋ كورسەتكىشى قايتادان 500 ادامنان اسىپ كەتتى. اندالۋسيا، مۋرسيا، كاستيليا- لەون اۆتونومدى قاۋىمداستىقتارىنىڭ باسشىلارى ءوز ايماقتارىندا ۇيدە وقشاۋلاۋ رەجيمىن ەنگىزۋ ءۇشىن ەل ۇكىمەتىنەن قۇقىق پەن مۇمكىندىك بەرۋدى سۇراپ وتىر.
دۇنيەجۇزىلىك دەنساۋلىق ساقتاۋ ۇيىمىنىڭ حالىقارالىق ساراپشىلار توبى قىتايدىڭ ۋحان قالاسىنا كوروناۆيرۋستىڭ شىعۋ سەبەبىن زەرتتەۋ ءۇشىن كەلدى. جۇمىسقا كىرىسپەس بۇرىن 10 ساراپشى ەكى اپتالىق كارانتيننەن وتۋلەرى كەرەك. بىرنەشە اي بويى بولعان تۇراقتىلىقتان كەيىن، سوڭعى اپتادا قىتايدا كوروناۆيرۋس ينفەكسياسىنىڭ تاۋلىكتىك تىركەلگەن سانى كۇرت ءوستى. ولاردىڭ كوپشىلىگى توتەنشە جاعداي جاريالانعان حەبەي پروۆينتسياسىندا انىقتالعان.
