قاراماعىندا كوللەدجدەرى بار جوعارى وقۋ ورىندارىنا قاتىستى قانداي وزگەرتۋ ەنگىزىلدى

نۇر- سۇلتان. قازاقپارات - زاڭناماعا ەنگىزىلگەن تۇزەتۋ جوعارى وقۋ ورىندارىنىڭ ۇزدىكسىز وقىتۋدى قامتاماسىز ەتۋ مۇمكىندىكتەرىن كەڭەيتەدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.

«ەندى قاراماعىندا كوللەدجدەرى بار جوعارى وقۋ ورىندارى دا تەحنيكالىق جانە كاسىپتىك ءبىلىم بەرۋ باعىتى بويىنشا مەملەكەتتىك تاپسىرىستى ورنالاستىرۋ راسىمىنە قاتىسا الادى» - دەپ جازدى ا. ايماعامبەتوۆ الەۋمەتتىك جەلىدەگى پاراقشاسىندا. وسى ورايدا مينيستر بۇعان دەيىن ولاردا مەملەكەتتىك تاپسىرىس الۋ قۇقىعى بولماعانىن ەسكە سالدى.

«ءبىز بۇل ماسەلەنى دە شەشتىك. ەنگىزىلگەن تۇزەتۋ جوعارى وقۋ ورىندارىنىڭ ۇزدىكسىز وقىتۋدى قامتاماسىز ەتۋ مۇمكىندىكتەرىن كەڭەيتەدى. بۇل تۇزەتۋلەردىڭ بارلىعى زاڭنامانى جەتىلدىرۋگە، جوعارى جانە جوعارى وقۋ ورنىنان كەيىنگى ءبىلىم ساپاسىن ارتتىرۋعا باعىتتالعان»، - دەدى ۆەدومستۆو باسشىسى.

بۇدان بۇرىن حابارلانعانداي، گرانتپەن وقىعان تۇلەك ءوز دايىندىق باعىتى بويىنشا جەكەمەنشىك ۇيىمداردا ەش كەدەرگىسىز جۇمىس ىستەي الادى. ايتا كەتەيىك، 2021 -جىلدان باستاپ ءاربىر جوعارى وقۋ ورنى ءبىلىم العان ازاماتتارعا جەكە ۇلگىسى بويىنشا ديپلوم بەرەتىن بولادى. ياعني، ەندى ءار جوعارى وقۋ ورنىندا بەرىلەتىن ديپلومداردىڭ بارلىعى بىركەلكى بولمايدى. بۇدان بىلاي مەملەكەتتىك ۇلگىدەگى ديپلومدار بەرىلمەيدى.

اۆتور: رۋسلان عابباسوۆ