تانىمالى انيماتسيالىق فيلمدەردەگى سۇيىكتى اندەر قازاق تىلىندە ورىندالادى
وندا انيماتسيالىق فيلمدەردەگى اندەر قازاق تىلىندە شىرقالاتىن بولادى، دەپ حابارلايدى قازاقپارات ءتىلشىسى.
كينوكونسەرت - بۇل ءبىر مەزگىلدە ەسترادالىق- سيمفونيالىق وركەستر مەن ايگىلى ورىنداۋشىلاردىڭ سۇيەمەلدەۋىمەن ۇلكەن ەكراننان Disney فيلمدەرىنىڭ ۇزىندىلەرىن قاراۋ. كينوكونسەرت ەرەكشەلىگى - ونىڭ ينتەراكتيۆتى فورماتتا وتەتىنى. مۋزىكا ەكرانداعى كورىنىسپەن ءدال سايكەس كەلۋى كەرەك، وركەستردىڭ تەمپى پەن ىرعاعى سوعان بايلانىستى.
«جۇلدىزدار شەرۋى» كينوكونسەرتىنىڭ بىرەگەي باعدارلاماسى قازاقستان ءۇشىن ارنايى جاسالعان. باعدارلاماعا بارلىعى اتى اڭىزعا اينالعان Disney - ءدىڭ 11 انيماتسيالىق فيلمىنەن قازاق تىلىندەگى 22 كومپوزيتسيا كىردى: «سۇلۋ مەن قۇبىجىق»، «الاددين»، «موانا»، «مۇزدى ولكە»، «ارىستان پاتشا»، «مۋلان» جانە باسقالارى.
فيلمدەردىڭ مۋزىكاسىن تانىمال كومپوزيتورلار، كوپتەگەن سىيلىق يەگەرلەرى: حانس تسيممەر، الان مەنكەن جانە دجەرري گولدسميت جازعان. كينوكونسەرتتە ورىندالعان ساۋندترەكتەر 11 «وسكار» سىيلىعىن العان. اندەردىڭ باسىم بولىگى «وزىڭنەن باستا» جوباسى اياسىندا قازاق تىلىنە دۋبلياجدالعان فيلمدەردەن الىنعان. قالعاندارى كينوكونسەرت ءۇشىن قازاق تىلىنە ارنايى اۋدارىلعان. كينوكونسەرتتىڭ ماقساتى - سۇيىكتى Disney كەيىپكەرلەرى ارقىلى قازاق ءتىلىن جانە كلاسسيكالىق مۋزىكانى دارىپتەۋ.
اۆتور: رۋسلان عابباسوۆ
