استانالىقتار كينوتەاترلاردا قانداي تالاپتاردى ساقتاۋى ءتيىس
وسى ورايدا سانيتارلىق- ەپيدەميولوگيالىق باسقارما وكىلدەرى ەلوردا تۇرعىندارى كينوتەاترلاردا قانداي تالاپتاردى ساقتاۋى ءتيىس ەكەندىگى تۋرالى ايتىپ بەردى، دەپ حابارلايدى قازاقپارات ءتىلشىسى.
«بۇگىنگى مونيتورينگتىك شارانىڭ ماقساتى - ەلورداداعى كينوتەاترلاردىڭ جۇمىس ىستەۋ ءتارتىبى مەن سانيتارلىق تالاپتاردى ساقتاۋىن ءتۇسىندىرۋ جانە قاداعالاۋ. وزدەرىڭىز بىلەتىندەي كەشە عانا قالالىق باس دارىگەردىڭ كينوتەاترلاردىڭ جۇمىس ىستەۋىنە رۇقسات بەرۋ تۋرالى قاۋلىسى شىقتى. بارلىق كينوتەاترلار سانيتارلىق تالاپتاردى بىردەي جانە قاتاڭ تۇردە ساقتاۋى ءتيىس. ونىڭ ىشىندە ماسكا تاعىپ ءجۇرۋ، انتيسەپتيكتىڭ بولۋى مىندەتتى جانە ادامدار اراسىنداعى اراقاشىقتىقتى ساقتاۋ. كينوتەاترلاردىڭ تاڭەرتەڭگى ساعات 10:00دەن، تۇنگى ساعات 00:00 دە دەيىن جۇمىس ىستەۋىنە رۇقسات بەرىلدى»، - دەدى نۇر- سۇلتان قالاسى ەسىل اۋداندىق سانيتارلىق- ەپيدەميولوگيالىق باسقارماسىنىڭ باسشىسى ارمان قۇربانوۆ.
ونىڭ ايتۋىنشا، ەلورداداعى كينوتەاترلاردىڭ جۇمىس ىستەۋ بارىسىن ارنايى مونيتورينگتىك توپ قاداعالايتىن بولادى.
«كورەرمەندەر وزىمەن بىرگە تاماق الىپ كەلۋگە بولمايدى، تەك قانا سۋعا رۇقسات بەرىلەدى. تاعى ءبىر ايتىپ وتەتىن دۇنيە، 5 جاسقا دەيىنگى بالالاردىڭ كينوتەاترلاردا ماسكاسىز جۇرۋىنە رۇقسات بار، ال ودان جوعارى بالالار مەن ەرەسەكتەر مىندەتتى تۇردە ماسكا تاعىپ ءجۇرۋى كەرەك. سونداي- اق، 5 جاسقا دەيىنگى بالالاردى اتا- انالار وزدەرىنىڭ قاسىنا الىپ وتىرۋعا بولادى. بىزدە ارنايى مونيتورينگتىك توپ قۇرىلدى، توپ مۇشەلەرى قالا بويىنشا كينوتەاترلاردىڭ سانيتارلىق تالاپتاردى ساقتاۋىن قاداعالايدى. كينوتەاترلارعا رەيد كۇندىز جانە تۇندە جۇرگىزىلەتىن بولادى. ەگەر ءتيىستى تالاپتاردىڭ بۇزىلعانى انىقتالعان جاعدايدا، اكت تولتىرىلىپ كينوتەاتر وكىلدەرى جاۋاپقا تارتىلاتىن بولادى»، - دەدى ول.
ايتا كەتسەك، بۇگىن ەلوردادا ارنايى مونيتورينگتىك توپ وكىلدەرى كينوتەاترلارىنىڭ جۇمىس ىستەۋگە دايىندىق بارىسىن تەكسەرىپ شىقتى. ەسكە سالا كەتسەك، ەلوردادا 26 -جەلتوقساننان باستاپ قالانىڭ باس سانيتارلىق دارىگەرى جاننا پىرالييەۆانىڭ قاۋلىسىمەن كينوتەاترلاردىڭ سانيتارلىق- ەپيدەميولوگيالىق نورمالارعا ساي جۇمىس ىستەۋىنە رۇقسات بەرىلدى.
