كوروناۆيرۋس: قازاقستاندىق ۆاكسيناعا ەرىكتى بولۋ جولدارى ءتۇسىندىرىلدى
«ەرىكتى بولۋ وتە وڭاي. الماتى، تاراز قالالارىندا ەرىكتى بولۋ مۇمكىندىگى بار. قازىرگى ۋاقىتتا الماتىدا ءتيىستى سەرتيفيكاتى بار بىرنەشە كلينيكالىق بازالاردا سكرينينگ جانە ەرىكتىلەردى ۆاكسينالاۋ ءجۇرىپ جاتىر. قاجەت بولسا، بىزدە بايلانىسۋعا بولاتىن نومىرلەر بار»، - دەپ جاۋاپ بەردى ءبىلىم ءمينيسترى ورتالىق كوممۋنيكاتسيالار قىزمەتىندە ءتىلشى سۇراعىنا.
ايتا كەتەيىك، ەلىمىزدە QazCovid-in ۆاكسيناسىن كلينيكالىق سىناۋدىڭ ءۇشىنشى كەزەڭى باستالدى. وندا ءۇش مىڭ ەرىكتىگە ۆاكتسينا سالىناتىنى حابارلاندى.
«ءبىز ءۇش مىڭ ەرىكتىنى جينايمىز جانە جىل سوڭىنا دەيىن ولارعا ۆاكسينا سالىنادى. قازىر دە كوپتەگەن ەرىكتىلەر ۆاكسينالانىپ ۇلگەردى. ەرىكتى بولۋ ءۇشىن ولار مىندەتتى تۇردە مەديتسينالىق تەكسەرۋدەن ءوتۋى كەرەك. ولار كوپتەگەن ەگجەي- تەگجەيلى اناليزدەر تاپسىرادى. اناليزدەن وتكەن سوڭ كەلىسىم جاسالادى، شارتتار ايتىلادى جانە ءومىردى ساقتاندىرۋ ماسەلەلەرى كەلىسىلەدى. زاڭناماعا سايكەس باسقا دا نيۋانستار بار. وسىدان كەيىن عانا ەرىكتى بولىپ، ۆاكسينالار قابىلدايدى. ەكپە سالىنعاننان كەيىن دە كەلىسىمدە كورسەتىلگەن تالاپتار بار»، - دەيدى مينيستر.
اسحات ايماعامبەتوۆ ۆاكسينانىڭ ءبىرىنشى كەزەڭىندە از عانا ۋاقىتتا كوپتەگەن ءوتىنىم كەلىپ تۇسكەنىن اتاپ ءوتتى.
«ءبىز كوپتەگەن وتىنىمدەردى قابىلدادىق جانە ءوتىنىم قابىلداۋدى مەرزىمىنەن بۇرىن جابۋعا ءماجبۇر بولدىق. ەكىنشى كەزەڭدە دە جاعداي شامامەن وسىنداي بولدى. قازىر ءۇشىنشى كەزەڭدە كونتينگەنتتىڭ كوپ بولۋىنا بايلانىستى ەرىكتىلەردى الدىن الا ءۇش مىڭنان اسىرىپ جيناعىمىز كەلەدى. سەبەبى ءۇش مىڭ ەرىكتىنى ىرىكتەپ الۋ ءۇشىن سكرينينگ جۇرگىزۋ وتە ماڭىزدى. قازىر دە ەرىكتىلەردى قابىلداۋ جالعاسۋدا. ەرىكتى بولعىسى كەلەتىن ازاماتتار وسىنداي قۇقىق پەن مۇمكىندىكتى پايدالانا الادى»، - دەدى ا. ايماعامبەتوۆ.
اۆتور: ايجان سەرىكجان قىزى
