يسلامابادتا ءال-فارابي جاھاندىق فورۋمى ءوتىپ جاتىر
القالى جيىنعا پاكىستان يسلام رەسپۋبليكاسىنىڭ پرەزيدەنتى اريف الۆي، COMSTECH ديرەكتورى مۇحاممەد يكبال چاۋداري، حالىقارالىق تۇركى اكادەمياسىنىڭ پرەزيدەنتى دارحان قىدىرالى، يسلام ىنتىماقتاستىعى ۇيىمى باس حاتشىسىنىڭ ورىنباسارى اسقار مۋسين، قازاقستان رەسپۋبليكاسىنىڭ ساۋد ارابياسى كورولدىگىندەگى، باحرەين كورولدىگىندەگى توتەنشە جانە وكىلەتتى ەلشىسى بەرىك ارىن، كاليفورنيا ۋنيۆەرسيتەتىنىڭ پروفەسسورى اساد احمەد، لاحور مەنەدجمەنت جانە تەحنولوگيالار ۋنيۆەرسيتەتى پروفەسسورى سايد نومانۋل حاك، وكسفورد ۋنيۆەرسيتەتى پروفەسسورى فارحان نيزامي، ميۋنحەن ۋنيۆەرسيتەتىنىڭ پروفەسسورى پيتەر ادامسون، بات سپا ۋنيۆەرسيتەتى (ۇلى بريتانيا) پروفەسسورى يفتيحار ماليك، سونىمەن قاتار الەمنىڭ تانىمال فارابيتانۋشى عالىمدارى قاتىستى.
حالىقارالىق فورۋمنىڭ مارتەبەلى قوناعى بولعان اكادەميا باسشىسى دارحان قىدىرالى قۇتتىقتاۋ ءسوز سويلەپ، ۇيىمنىڭ ءال-فارابي جىلىندا اتقارعان جۇمىستارى تۋرالى بايانداپ، جيىننىڭ ءساتتى وتۋىنە تىلەكتەستىك ءبىلدىردى.
ايتا كەتۋ كەرەك، 1969-جىلعى 25- قىركۇيەكتە رابات قالاسىندا وتكەن كونفەرەنتسيادا نەگىزى قالانعان يسلام ىنتىماقتاستىعى ۇيىمى (ي ى ۇ) - ەڭ ءىرى جانە ىقپالدى ۇكىمەتتىك ءارى حالىقارالىق مۇسىلمان ۇيىمى. قازىرگى ۋاقىتتا ول جالپى سانى شامامەن 1,5 ميلليارد ادامدى قامتيتىن 57 ەلدىڭ باسىن بىرىكتىرىپ وتىر. سونداي-اق دارحان قىدىرالى پاكىستان يسلام رەسپۋبليكاسىنىڭ سىرتقى ىستەر ءمينيسترىنىڭ ءبىرىنشى ورىنباسارى سوحايل ماحمۋدپەن كەزدەستى.
جۇزدەسۋ بارىسىندا تاراپتار ءوزارا عىلىمي ىنتىماقتاستىقتى نىعايتۋ ماسەلەلەرىن تالقىلادى. سونىمەن قاتار، سىرتقى ىستەر ءمينيسترىنىڭ ءبىرىنشى ورىنباسارى بۇگىن باستالعان ءال-فارابي جاھاندىق فورۋمىنا جوعارى باعا بەردى.
ءوز كەزەگىندە دارحان قىدىرالى جوعارعى دەڭگەيدە وتكەن كەزدەسۋگە ريزاشىلىعىن ءبىلدىرىپ، اكادەميا دايىنداعان ءبىرقاتار عىلىمي ەڭبەكتەردى تارتۋ ەتتى.
