تارازدا العاش رەت جۇرەكتىڭ قولقا كلاپانى پلاستيكامەن الماستىرىلدى

تاراز. قازاقپارات - جامبىل وبلىسىنداعى كارديوحيرۋرگيا جانە ترانسپلانتولوگيا ​ عىلىمي- كلينيكالىق ورتالىعىندا ۋكراينادان جانە ەلىمىزدىڭ باس قالاسى نۇر- سۇلتاننان كەلگەن كارديوحيرۋرگيا مايتالماندارى وڭىردە بۇرىن- سوڭدى جاسالماعان جۇرەكتىڭ ورتا كلاپانىنا پلاستيكا قويۋعا ارنالعان شەبەرلىك سىنىبىن وتكىزدى، - دەپ حابارلايدى قازاقپارات ءتىلشىسى.

ءبىر اپتانىڭ ىشىندە وبلىستاعى بەس جاس پاتسيەنتكە جاسالعان وتانىڭ بارلىعى ءساتتى ءوتىپ، جۇرەك كلاپاندارى اۋىستىرىلعان جاسوسپىرىمدەر ءبىر تاۋلىكتەن سوڭ، جاعدايلارى جاقسارىپ، وزدەرىنە كەلگەن. ۋكرايناداعى العاشقى جۇرەك ترانسپلانتاتسياسىنىڭ اۆتورى، ەكونوميكالىق ءتيىمدى دەنساۋلىق ساقتاۋ مەن وركەنيەتتى ترانسپلانتولوگيا مەنەدجمەنتىن قالىپتاستىرۋشى، كارديوحيرۋرگ، پروفەسسور، ۋكراينانىڭ ەڭبەك سىڭىرگەن دارىگەرى، جۇرەك ينستيتۋتىنىڭ ديرەكتورى، قوعام قايراتكەرى، بلوگەر بوريس ميحايلوۆيچ تودۋروۆ (كيەۆ) تاراز قالاسىنا العاش رەت كەلگەنىن ايتادى.

- قازاقستاندا كارديوحيرۋرگيا قىزمەتى سوڭعى 15 جىلدا قارقىندى دامىپ كەلەدى. دامىعانى سونشالىقتى، بۇگىندە پلاستيكالىق حيرۋرگيانىڭ جاڭا ءادىس- تاسىلدەرى پايدا بولىپتى. جالپى، قازاقستاننىڭ كارديوحيرۋرگتەرىنىڭ دەڭگەيى وتە جوعارى. جۇرەككە جاسالاتىن جاي وتادان باستاپ، ونى الماستىرۋعا دەيىن جەتكەن. وسى تاراز قالاسىنا كەلگەلى بەرى بۇگىنگى ءۇشىنشى كۇندە بەسىنشى وتانى جاسادىم. بۇل وتا - قازاقستان- ۋكراينا اراسىنداعى ىنتىماقتاستىق جونىندەگى مەموراندۋم اياسىندا وڭىردە العاش رەت جاسالىپ وتىر. الداعى ۋاقىتتا وسى كلينيكا دارىگەرلەرى بۇل وپەراتسيانى وزدەرى- اق جاسايتىن بولادى. مەن وسى ەلدىڭ جاس پاتسيەنتتەرىنە ەكىنشى ءومىر سىيلاپ، قىسىلىپ قالعان كلاپاندارىنىڭ قولقا تامىرلارىنا قان ءجۇرىپ، دەنساۋلىقتارىنىڭ جاقسارۋىنا جاعداي جاساپ جاتقانىما قۋانىشتىمىن، - دەيدى ب. تودۋروۆ.

اۆتور: سايا سەمباي