عالىمدار كونە تۇركى ءتىلى مەن ادەبيەتىن زەرتتەۋ جايىن تالقىلادى
اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە بەلگىلى تۇركىتانۋشى عالىم نەمات كەلىمبەتوۆتى ەسكە الۋعا ارنالعان «بايىرعى تۇركى ءتىلى مەن ادەبيەتىن زەرتتەۋ ماسەلەلەرى» اتتى حالىقارالىق عىلىمي جيىن ءوتتى.
ۋنيۆەرسيتەت جانىنداعى نەمات كەلىمبەتوۆ اتىنداعى تۇركى تانۋ ورتالىعى ۇيىمداستىرعان كونفەرەنسياعا قازاقستان، ازەربايجان، قىرعىزستان وزبەكستان جانە تۇركيا ەلدەرىنىڭ تۇركىتانۋشى عالىمدارى قاتىستى.
جيىندا كونە تۇركى ءتىلى مەن ادەبيەتى ماسەلەلەرى تالقىلاندى. ونلاين- كونفەرەنسيانىڭ اشىلۋىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى تاكير بالىقبايەۆ، ق ر ستراتەگيالىق جوسپارلاۋ جانە رەفورمالار اگەنتتىگىنىڭ ءتوراعاسى، «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ، تۇركيا مەملەكەتتىك تۇرىك ءتىلى قوعامىنىڭ پرەزيدەنتى گۇرەر گۇلسيەۆين مىرزالار قاتىسىپ، ءسوز سويلەدى.
جيىن بارىسىندا نەمات كەلىمبەتوۆ اتىنداعى تۇركى تانۋ ورتالىعىنىڭ عىلىمي قىزمەتكەرلەرى شەرۋباي قۇرمانباي ۇلى مەن مارلەن ءادىلوۆتىڭ «اباي ءتىلىنىڭ ەرەكشەلىكتەرى» اتتى جاڭا كىتاپتىڭ تۇساۋكەسەر ءراسىمى ءوتتى. كىتاپتا اباي شىعارمالارىنداعى قازىرگى قازاق ادەبي تىلىندە كەزدەسپەيتىن نەمەسە وتە سيرەك قولدانىلاتىن تىلدىك ەرەكشەلىكتەر مورفولوگيالىق، فونەتيكالىق جانە لەكسيكالىق ايىرماشىلىقتار تۇرعىسىنان قاراستىرىلعان.
حالىقارالىق وتىرىسقا قازاقستان، تۇركيا، قىرعىزستان، وزبەكستان، ازەربايجان ەلدەرىنىڭ تۇركولوگ عالىمدار كونە تۇركى ءتىلى مەن ادەبيەتىنىڭ ماسەلەلەرىنە قاتىستى عىلىمي باياندامالار جاسادى.
ەسكە سالا كەتەيىك، كورنەكتى تۇركىتانۋشى عالىم، بەلگىلى جازۋشى، تالانتتى اۋدارماشى، ق ر گۋمانيتارلىق عىلىمدار اكادەمياسىنىڭ اكادەميگى، حالىقارالىق كۇلتەگىن، فرانتس كافكا سىيلىقتارىنىڭ يەگەرى نەمات كەلىمبەتوۆ بۇدان ون جىل بۇرىن 15- جەلتوقسان كۇنى ومىردەن وزعان بولاتىن.
