«قازاقتىڭ ۇلدارى»: ەرجان ماكسيمنىڭ جاڭا بەينەبايانى شىقتى

نۇر- سۇلتان. قازاقپارات - قازاقستاندىق دارىندى ءانشى ەرجان ماكسيمنىڭ جاڭا بەينەبايانى تانىستىرىلدى، دەپ حابارلايدى قازاقپارات ءتىلشىسى.

«مەن بۇل ءاندى ەلىمىزدىڭ تاۋەلسىزدىك كۇنىنە ارناعىم كەلەدى. حالقىمىز تاتۋ- ءتاتتى ءارى بىرلىكتە ءومىر سۇرگەنىن قالايمىن»، - دەدى ءانشى.

بەينەباياندى الماتىدا «حابار» اگەنتتىگىنىڭ شىعارماشىلىق توبى تۇسىرگەن. انگە جاۋىنگەرلىك رۋح، تايسالمايتىن مىنەز، قاجىماس قايرات ارقاۋ بولعان. باستى كەيىپكەر رەتىندە ەرجان ماكسيمنىڭ ءوزى تۇسكەن. سونداي- اق كليپتەن تانىمال انشىلەردەن بۇركىت پەن نۇرلان ابدۋلليندى، جىگىتتەر توبىن، سپورتشىلاردان وليمپيادا چەمپيونى ەرماحان يبرايموۆتى، كاسىپقوي بوكسشى جانقوش تۇراروۆتى كورۋگە بولادى. «حابار» تەلەارناسىنىڭ ديرەكتورى دينارا بيسەمبينا جاستارعا وسىلايشا قولداۋ ءبىلدىرۋ كەرەكتىگىن ايتادى.

«ەرجان ماكسيمدى قولداۋعا بەل بۋدىق. ءان باتىرلارعا ارنالعان. بۇل بەينەباياندى ەرجاننىڭ قازاقستاندىقتارعا ارناعان سىيى دەۋگە بولادى»، - دەيدى ول.