قازاقستاندىقتار «وسكارعا» ۇسىنىلعان «ۇلى دالا زارى» فيلمىن تەگىن كورە الادى

نۇر-سۇلتان. قازاقپارات - اشارشىلىق پەن ساياسي قۋعىن-سۇرگىن قۇرباندارىنا، اتا-بابالار رۋحىنا باعىشتالا تۇسىرىلگەن «ۇلى دالا زارى» فيلمى كورەرمەنگە تەگىن كورسەتىلگەلى جاتىر، دەپ حابارلايدى قازاقپارات ءتىلشىسى.

فيلم بۇگىن، ياعني 15- جەلتوقسان كۇنى ساعات 20.00 دەن باستاپ، 16- جەلتوقسان تۇنگى 24.00 گە دەيىن (1 تاۋلىك بويى) كورسەتىلەدى.

«فيلم www.cinexus.kz ينتەرنەت-كينوتەاترىندا تەگىن كورسەتىلەدى.

تۋىندىنى تەلەفوننىڭ، كومپيۋتەردىڭ بارلىق تۇرىنەن بۇكىل اۋىل-ايماقتار كورە الادى.

«ۇلى دالا زارى» فيلمى كينو الەمىندە ەڭ جوعارعى «وسكار» مەن «التىن گلوبۋس» جۇلدەسىن (2021- جىلى) جەڭىپ الۋ ءۇشىن جۇزدەگەن مەملەكەتپەن قازاقستان اتىنان سايىسقا تۇسەدى»، - دەيدى فيلمنىڭ پروديۋسەرى ەرنار مالىكوۆ.

ەسكە سالا كەتسەك بۇعان دەيىن اتالمىش كينوتۋىندى «وسكار» سىيلىعىنىڭ «شەت تىلدەگى ۇزدىك فيلم» نوميناتسياسىنا ۇسىنىلعانىن حابارلاعان ەدىك.