ۇلتتىق بانك قازاقستاننىڭ قارجى نارىعىندا تۇراقتىلىقتى قامتاماسىز ەتۋ ءۇشىن قوسىمشا شارالار قابىلداۋعا دايىن
بۇل تۋرالى بانك ءتوراعاسىنىڭ ورىنباسارى ءاليا مولدابەكوۆا ايتتى، دەپ حابارلايدى قازاقپارات ءتىلشىسى. ونىڭ ايتۋىنشا، نارىقتاعى قۇبىلمالى جاعداي تەڭگە باعامىنا اسەر ەتەدى. «تەڭگە قۇبىلمالىلىعىنىڭ ارتۋى 2020 -جىلى بۇرىن- سوڭدى بولماعان كۇتپەگەن وزگەرىس جاعدايىندا سىرتقى نارىقتاعى جوعارى قۇبىلمالىلىققا سايكەس كەلەدى. ماسەلەن، Vix قۇبىلمالىلىق يندەكسىنىڭ ورتاشا ءمانى 2019 –جىلعى %15,4 دان اعىمداعى جىلى %30 عا دەيىن ەكى ەسە ءوستى. مۇناي باعاسىنىڭ ورتاشا كۇندىك قۇبىلمالىلىعى 2019 -جىلعى %2,1 دان 2020 -جىلى %4,3 عا دەيىن ءوستى»، - دەيدى ءاليا مولدابەكوۆا.
تەڭگەنىڭ قۇبىلمالىلىعى وزگەرمەلى ايىرباستاۋ باعامىنىڭ وبەكتيۆتى سالدارى رەتىندە باعامنىڭ نارىقتىق تۇزەتىلۋىن قامتاماسىز ەتەدى جانە ەكونوميكادا تەڭگەرىمسىزدىكتىڭ جيناقتالۋىن بارىنشا ازايتادى. تەڭگە باعامىنىڭ السىرەۋىنەن ونى ۇستاپ تۇرۋ ناقتى ايىرباستاۋ باعامىنىڭ شامادان تىس نىعايۋىنا جانە تيىسىنشە، وتاندىق ەكونوميكانىڭ ساۋدا ارىپتەستەرى الدىنداعى باسەكەگە قابىلەتتىلىگىن جوعالتۋعا اكەپ سوعادى. كەرىسىنشە، ۇلتتىق ۆاليۋتانىڭ نىعايۋىنا كەدەرگى ناقتى ايىرباستاۋ باعامىنىڭ شامادان تىس السىرەۋىنە جانە ينفلياتسيالىق پروتسەستەردىڭ وسۋىنە اكەپ سوعادى. نەگىزدەلگەن قۇبىلمالىلىق قالىپتى جۇمىس ىستەيتىن ۆاليۋتا نارىعىنىڭ سيپاتتاماسى بولىپ تابىلادى جانە نارىق قاتىسۋشىلارىنىڭ ءتيىمدى ءىس- قيمىلىنا ىقپال ەتەدى.
«ۇلتتىق بانك الداعى ۋاقىتتا دا تەڭگەنىڭ ورىندى قۇبىلمالىلىعىن شەكتەمەيدى. ينتەرۆەنتسيالار قارجىلىق تۇراقتىلىق ءۇشىن تاۋەكەلدەردى شەكتەۋ جانە ىرگەلى نەگىزى جوق ايىرباستاۋ باعامىنىڭ تۇراقسىزداندىراتىن قىسقا مەرزىمدى اۋىتقۋلارىن رەتتەۋ ماقساتىندا عانا جۇرگىزىلەتىن بولادى»، - دەيدى ۇلتتىق بانك وكىلى.
