شەتەلدىكتەرگە قازاق ءتىلىن ۇيرەتەتىن «اباي ينستيتۋتى» پورتالى ىسكە قوسىلدى
پورتالدىڭ اشىلۋىندا ءتىل ساياساتى كوميتەتىنىڭ ءتوراعاسى ادىلبەك قابا مەملەكەت باسشىسىنىڭ ۇلى ابايدىڭ 175 جىلدىعىن جوعارى دەڭگەيدە مەرەكەلەۋ تۋرالى ارنايى جارلىعى - حالقىمىزدىڭ تاريحي جادى مەن رۋحاني ومىرىنە سونى سەرپىلىس اكەلگەن تاريحي وقيعا بولعانىن اتاپ ءوتتى.
«مادەنيەت جانە سپورت مينيسترلىگى تاراپىنان وسى باعىتتا قولعا العان شارۋانىڭ شوقتىعى بيىگى - وسى «اباي ينستيتۋتى» اشىق ءبىلىم بەرۋ جوباسى. بۇل شارانىڭ قاينار كوزى «قازاقستان رەسپۋبليكاسىنداعى ءتىل ساياساتىن ىسكە اسىرۋدىڭ 2020-2025 -جىلدارعا ارنالعان مەملەكەتتىك باعدارلاماسىنان» باستاۋ الادى. قازىرگى تاڭدا «وتانداستار» قورىمەن بىرلەسىپ، بەس مەملەكەتتە، اتاپ ايتقاندا تۇركيا، يران، رەسەي، بەلگيا جانە ا ق ش ەلدەرىندە قازاق ءتىلىن وقىتۋ كۋرستارىن باستادىق»، - دەدى ادىلبەك قابا.
شايسۇلتان شاياحمەتوۆ اتىنداعى «ءتىل- قازىنا» ۇلتتىق عىلىمي- پراكتيكالىق ورتالىعى ديرەكتورىنىڭ ورىنباسارى ايدوس ءابدىحالىق پورتال تۋرالى جان- جاقتى اڭگىمەلەپ بەرسە، جازۋشى، فيلولوگيا عىلىمدارىنىڭ دوكتورى، ابايتانۋشى تۇرسىن جۇرتباي ىسكە قوسىلىپ جاتقان جوبادان ۇلكەن ءۇمىت كۇتەتىنىن جاسىرمادى.
«ءبىزدىڭ بۋىن بالانىڭ ويىنى دەپ ساناپ كەلگەن عالامتور بۇگىندە زامان ءتىلى رەتىندە تانىلىپ، ءتىپتى مەملەكەتتەردىڭ ساياساتىن ايقىنداپ بەرەتىن قۇرال دەڭگەيىنە كوتەرىلدى. سوندىقتان، قازاق ءتىلىن بىلگىسى كەلەتىن شەتەلدىكتەرگە بۇل جوبا ۇلكەن كومەك بولادى دەپ ويلايمىن. ءوز باسىم وسىنداي ەۋروپالىقتارعا كۋا بولىپ، قىتاي عالىمىنىڭ اباي قاراسوزىنىڭ اۋدارماسىنا: «مۇنى نەعىپ بۇرىن بىلمەگەنمىن»، - دەپ تاڭ قالعانىن كوردىم. ەندى كوركەمدىك دەڭگەيىن كوتەرىپ، وسى پورتالعا جاريالاسا، قانشالىقتى كومەك بولار ەدى»، - دەدى ول.
قازاقستان رەسپۋبليكاسى سىرتقى ىستەر مينيسترلىگى دياسپورالارمەن جۇمىس جونىندەگى باسقارما باسشىسى مۇقتار كارىباي، قازاقستان رەسپۋبليكاسى اقپارات جانە قوعامدىق دامۋ مينيسترلىگى «وتانداستار قورى» پرەزيدەنتىنىڭ كەڭەسشىسى ديدار بولات اقجولتاي تىلەك ءبىلدىردى.
