بالا مەكتەپ جاسىنان كوركەم ادەبيەتتى وقۋعا ۇمتىلۋى كەرەك - اسحات ايماعامبەتوۆ

نۇر- سۇلتان. قازاقپارات - ق ر ءبىلىم جانە عىلىم ءمينيسترى اسحات ايماعامبەتوۆ ەلىمىزدە كىتاپ وقۋ ساۋاتتىلىعىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«حالىقارالىق ساراپشىلاردىڭ ايتۋىنشا، جەتىستىكتەرگە قول جەتكىزىپ، باسەكەگە قابىلەتتى ءارى قازىرگى قوعامدا ءوزارا بايلانىس ورناتا بىلەتىن تۇلعا بولىپ قالىپتاسۋ ءۇشىن كىتاپ وقۋعا دەگەن قۇشتارلىقتىڭ اسەرى مول. كىتاپ وقۋ ساۋاتتىلىعى دەڭگەيىن انىقتاۋ ماقساتىندا الەمنىڭ كوپتەگەن ەلدەرى OECD جانە IEA سىندى حالىقارالىق سالىستىرمالى زەرتتەۋلەرىنە قاتىسىپ، ناتيجەلەرىن قولدانادى. PISA زەرتتەۋلەرىنىڭ ناتيجەلەرى بويىنشا قازاقستان وقۋشىلارى وقۋ ساۋاتتىلىعى بويىنشا ەكونوميكالىق ىنتىماقتاستىق جانە دامۋ ۇيىمىنا مۇشە ەلدەرىندەگى ءوز قاتارلاستارىنان ەداۋىر ارتتا قالىپ وتىر. PIAAC حالىقارالىق زەرتتەۋىنىڭ قورىتىندىسى بويىنشا ەلىمىزدەگى 16-دان باستاپ 55 جاسقا دەيىنگى ازاماتتاردىڭ دا وقۋ ساۋاتتىلىعى ناشار بولىپ شىقتى. ياعني، وكىنىشكە قاراي، ەلىمىزدەگى ەرەسەك ازاماتتاردىڭ دا وقۋ ساۋاتتىلىعى تومەن دەڭگەيدە. بۇل - بۇگىن عانا بەلگىلى بولعان پروبلەما ەمەس، جىلدار بويى قوردالانعان ماسەلە»، - دەپ جازدى مينيستر الەۋمەتتىك جەلىدەگى پاراقشاسىندا.

سونىمەن قاتار ول ءماتىندى ءتۇسىنىپ قابىلداۋ ماسەلەسىنە قاتىستى پىكىر ءبىلدىردى.

«ءبىزدىڭ بالالارىمىز كىتاپتى وقۋعا كەلگەندە جالقاۋلىق تانىتاتىنى ءبىر بولەك، كەيدە وقىعان ءماتىندى ناشار ءتۇسىنىپ، دۇرىس قابىلداي المايدى. وعان قوسا تالداۋ جانە قورىتىندى جاساۋ داعدىلارى دا اقساپ تۇر. بۇل شىن مانىندە ۇلتتىڭ باسەكەگە قابىلەتتىلىگىنە اسەر ەتەتىن ۇلكەن پروبلەما. سوندىقتان دا ۇلتتىق قوعامدىق سەنىم كەڭەسىنىڭ وتىرىسىندا مەملەكەت باسشىسى قاسىم- جومارت توقايەۆ ۇلتىمىزدىڭ وقۋعا قۇشتارلىعىن ارتتىرۋ ءۇشىن ءتيىستى شارالاردى قابىلداۋدى تاپسىردى. ول ءۇشىن بالا مەكتەپ جاسىنان باستاپ كوركەم ادەبيەتتى وقۋعا ۇمتىلۋى قاجەت. ءبىز وسى ماقساتتا جاعداي جاساۋعا مىندەتتىمىز»، - دەدى ا. ايماعامبەتوۆ.

اۆتور: رۋسلان عابباسوۆ