قازاقستاندا مەديتسينالىق ماسكالاردىڭ ساپاسى قالاي تەكسەرىلەدى
- ەلدە مەديتسينالىق ماسكالار ساراپتامادان قالاي وتەتىنىن جانە قالاي تىركەلەتىنىن ايتىپ بەرسەڭىز.
- ءدارىحانالاردا ساتىلاتىن مەديتسينالىق ماسكالار قازاقستاندا ەڭ الدىمەن مەملەكەتتىك تىركەۋدەن وتكىزىلەدى. تىركەۋگە دەيىن بۇل بۇيىمدار مىندەتتى تۇردە ساراپتاماعا جىبەرىلەدى. بۇل ساراپتامانى وتكىزۋدەگى ماقسات - ونىڭ ساپاسىن، تيىمدىلىگى مەن قاۋىپسىزدىگىن تەكسەرۋ. بۇل ءبىزدىڭ ەلدىڭ زاڭنامالىق تالابى. ساراپتاما بىرنەشە كەزەڭنەن تۇرادى: دەنساۋلىق ساقتاۋ ءمينيسترىنىڭ بۇيرىعىنا سايكەس، تولىمدىلىعىن تەكسەرۋ ءۇشىن قۇجاتتاردى جانە تىركەۋ قۇجاتتارىنىڭ ماتەريالدارىن ۆاليداتسيادان وتكىزۋ. ودان كەيىنگى كەزەڭدە ساراپشىلار مامانداندىرىلعان ساراپتامادا قۇجاتتاردىڭ حالىقارالىق جانە ۇلتتىق ستاندارتتارعا سايكەستىگىن سىناقتان وتكىزەدى. بيولوگيالىق زەرتتەۋلەر ەسەبى مەديتسينالىق ماسكا ادامنىڭ تەرىسىنە تىكەلەي جاناسىپ تۇراتىندىقتان، ونىڭ قاۋىپسىزدىگىن راستاۋى ءتيىس.
ودان بولەك، جوعارى تىنىس الۋ جولدارى - مۇرىن قۋىسى مەن اۋىزعا جاقىن قولدانۋعا ارنالۋى قاجەت. تەحنيكالىق سىناقتىڭ ناتيجەسى ماسكانىڭ تيىمدىلىگىن تەكسەرۋگە، ول اۋانى قالاي سۇزەتىنىن، باكتەريا مەن ۆيرۋستاردى ۇستاۋدا قاۋقارلىعىن بىلۋگە مۇمكىندىك بەرەدى. ارينە، وسىناۋ دالەلدى بازانىڭ ءبارىن دە زەرتتەۋ ءۇشىن ساراپشىلار وسى سىناقتار مەن زەرتتەۋلەر قالاي وتكىزىلگەنىن، ولاردىڭ قورىتىندىسى قالاي راسىمدەلگەنىن قاداعالاۋى ءتيىس. سوڭىندا ماسكا ۇلگىلەرى ساراپشىلار ۇيىمىنىڭ سىناق ورتالىعىنا تۇسەدى. وسى سىناقتاردىڭ ناتيجەسىندە مەديتسينالىق ماسكا ۇلگىلەرىنىڭ شىنايى كورسەتكىشتەرى ايقىندالادى. تەكسەرىستىڭ مۇنداي امالى تۇتىنۋشىعا ساپالى، ءتيىمدى ءارى ءقاۋىپسىز مەديتسينالىق ماسكانىڭ جەتكىزىلۋىن قاداعالاۋعا مۇمكىندىك بەرەدى.
- قازاقستاندا تىگىلگەن ماسكالار يمپورتتىق بۇيىمداردان ەرەكشەلەنە مە؟
- قازىر الەمدە بارلىق ەلگە ساپاسى جوعارى بولسىن، تومەن بولسىن ماتەريالدار مەن شيكىزات تەڭ دارەجەدە قولجەتىمدى. ايتسە دە قاداعالاۋدىڭ مەملەكەتتىك قۇرالى نارىققا وتاندىق نەمەسە يمپورتتىق ءونىم بولسىن، تەك تەكسەرىلگەن بۇيىم تۇسەتىندەي جۇمىس جۇرگىزەدى. تىگىلەتىن ماتەريالدارعا قاتىستى قابىلدانعان ءبىرىڭعاي حالىقارالىق تالاپتارمەن قاتار، وتاندىق وندىرۋشىلەر ءوز وندىرىسىندە باسقا دا تالاپتاردى ەنگىزىپ- اق جاتىر. ال بۇل ۇدەرىس «يمپورتتىڭ ءبارى جاقسى، وتاندىق ءونىمنىڭ ءبارى ناشار» دەگەن تاپتاۋرىن پايىمدى جوققا شىعارادى.
- ماسكانى قالاي تاڭداعان دۇرىس؟ ءسىز ءوزىڭىز قانداي ماسكانى تاققان دۇرىس دەپ ويلايسىز؟
- ارينە، ماسكانىڭ قاي ءتۇرى بولماسىن ءوز سيپاتىنا ساي ەرەكشەلەنەدى. قازىر ءبىز ولاردىڭ ءبارىن جىكتەپ، تالداپ، ءتۇسىندىرىپ وتىرساق، قاراپايىم تۇتىنۋشى ءۇشىن ول ۇعىمنىڭ ءبارى دە تۇسىنىكسىز بولارى انىق. ونىڭ كەرەگى دە جوق. ومىردەگى ءارتۇرلى جاعدايعا بايلانىستى جۇيەلى ءارى بەيىم امال بار. قازاقستاننىڭ زاڭىنا سايكەس كەز كەلگەن مەديتسينالىق بۇيىمنىڭ، ونىڭ ىشىندە مەديتسينالىق ماسكا پارتياسىنىڭ دا ءدارىحاناعا تۇسپەس بۇرىن ساپاسى مەن قاۋىپسىزدىگى راستالۋى كەرەك. قاۋىپسىزدىك سەرياسى/پارتياسى سايكەستىك سەرتيفيكاتىمەن بەكىتىلىپ، باعالانادى. ونىڭ كوشىرمەسىن ءسىز كەز كەلگەن ءدارىحانادان تالاپ ەتە الاسىز.
تىركەلگەن ءاربىر مەديتسينالىق ماسكا ونى قولدانۋ نۇسقاۋلىعىمەن بىرگە ءجۇرۋى ءتيىس. وسىلايشا جاڭا ايتقانىمداي، كەز كەلگەن ساتىپ الۋشى ءدارىحانا قىزمەتكەرىنەن سەرتيفيكاتتىڭ كوشىرمەسىن سۇراپ، ماركانىڭ مالىمەتتەرىنە سايكەستىگىن تەكسەرە الادى. قاجەتتى قۇجاتتاردىڭ ءبارىنىڭ ماركاعا سايكەستىگى ءوز كەزەگىندە بۇيىمنىڭ ساپالى ءارى قاۋىپسىز ەكەنىن دالەلدەيدى. الايدا بۇل تۇرعىدا مەديتسينالىق ماسكا نۇسقاۋلىققا جانە دارىگەردىڭ كەڭەسىنە ساي قولدانىلۋى كەرەك.
