ەلورداداعى ۇلتتىق مۋزەيدە «كونە تۇركى وركەنيەتى» زالى اشىلدى
اشىلۋ راسىمىنە ازەربايجان، تۇرىكمەنستان، قىرعىزستان، وزبەكستان، تۇركيا ەلشىلىكتەرىنىڭ وكىلدەرى قاتىستى.
كورمەنى ۇيىمداستىرۋداعى ماقسات - ەۋرازيانىڭ دالالىق اۋماعىندا يمپەريالىق دارەجەگە جەتكەن كونە تۇركى وركەنيەتىنىڭ مادەني جانە رۋحاني مۇرالارىن بۇگىنگى تۇركى حالىقتارىنىڭ مىزعىماس مۇراسى رەتىندە ناسيحاتتاۋ، ساقتاۋ.
«بۇگىن ءبىز ءۇشىن ەلەۋلى وقيعا. ەلباسى - نۇرسۇلتان نازاربايەۆتىڭ «ۇلى دالانىڭ جەتى قىرى» تاريحي ەڭبەگى اياسىندا كونە تۇركى مادەنيەتىن دامىتۋعا كوڭىل بولىنگەنىن ءبارىمىز جاقسى بىلەمىز. 2-3 جىل ىشىندە كوپ جۇمىس ىستەلدى. بۇل كورمە - ۇلتتىق مۋزەيگە، قازاقستانعا عانا ەمەس، تۇركى حالقىنا ورتاق دۇنيە»، - دەيدى ق ر ۇلتتىق مۋزەيىنىڭ ديرەكتورى ارىستانبەك مۇحامەدي ۇلى.
«كونە تۇركى وركەنيەتى» زالى ۇلى دالا توسىندە يمپەريالىق دارەجەگە جەتكەن ورتاعاسىرلىق تۇرىكتەردىڭ ماتەريالدىق، رۋحاني مادەنيەت قۇندىلىقتارىنا ارنالعان. تۇرىكتەردىڭ رەسمي تاريحى كوپ جاعدايدا ب. د. VI عاسىرىنان، ياعني تۇرىك قاعاناتىنىڭ قۇرىلۋىنان باستالادى.
تۇرىك وركەنيەتىنىڭ التىن بەسىگى التايدان باستاۋ الىپ ورتالىق ازيانىڭ دالالىق ايماعىنا، ەۋرازيانىڭ سولتۇستىگى مەن باتىس وڭىرىنە قاراي كەڭەيە تۇسكەن. زال ەكسپوزيتسياسى ءۇش بولىكتەن تۇرادى.
العاشقىسى تۇرىكتەردىڭ جازبا مادەنيەتىنە ارنالادى. ەجەلگى تۇرىك رۋنيكالىق جازۋلارى اۆتوحتوندى مادەنيەتتىڭ دالمە-ءدال ۇلگىسى. ولار ورتالىق ازيا، ءسىبىر جانە موڭعوليا مەن قازاقستان اۋماقتارىندا بولعان تاريحي وقيعالاردى ناقتى باياندايتىن العاشقى تاسقا قاشالىپ قالدىرىلعان اينىماس دالەلدەر.
كەلەسى ەكسپوزيتسيا تاس مۇسىندەرگە ارنالادى. ەجەلگى تۇرىكتەردىڭ مادەني جانە عۇرىپتىق كەشەندەرىنىڭ نەگىزگى قۇرامداس بولىگى.
ول ەۋرازيا دالاسىنىڭ ۇلى بەلدەۋىندەگى تۇرىك حالىقتارىنىڭ جەرلەۋ مەن ەسكە الۋ جانە ءدىني-يدەولوگيالىق قاعيدالارىمەن تىعىز بايلانىستى.
وسىلايشا ەكسپوزيتسيانىڭ بۇل بولىگى ەجەلگى تۇرىكتەردىڭ دۇنيەتانىمدىق كورسەتكىشتەرىنە نەگىزدەلگەن.
زال ەكسپوزيتسياسىنىڭ ءۇشىنشى بولىگى ورتاعاسىرلىق تۇرىك ءداۋىرى ەسكەرتكىشتەرىنەن انىقتالعان ات-ابزەلدەرى مەن قارۋ-جاراقتارى جانە ماتەريالدىق مادەنيەت كورسەتكىشتەرى توپتاستىرىلعان.
