كوروناۆيرۋس: نيۋ-يوركتە اۋرۋحاناعا تۇسكەن ادامدار سانى كۇرت ءوستى
كۋومو بايلانىس تىزبەگىن باقىلاۋ ارقىلى شتاتتا ۆيرۋستىڭ تارالۋىنا ادامداردىڭ تۇنگى ۋاقىتتا بار، مەيرامحانا جانە سپورتزالداردا جينالۋى نەگىزگى سەبەپ بولعانىن انىقتادى. ول شىعارعان بۇيرىق بويىنشاع جابىق عيماراتتاردا جۇمىس ىستەپ جۇرگەن بارلىق بارلار، مەيرامحانالار جانە ترەناجەر زالدارى ساعات 22:00-دە جابىلۋى ءتيىس، ال ءىس-شارالارعا جينالاتىنداردىڭ سانى 10 ادامنان اسپاۋى كەرەك.
مالىمدەمەدە اتاپ وتىلگەندەي، جۇما كۇنى كۇشىنە ەنەتىن جاڭا شارالار كاليفورنيا مەن باتىستاعى بىرنەشە شتاتتىڭ كوروناۆيرۋستىڭ تەز تارالۋىن ۇستاپ قالۋ ءۇشىن شەكتەۋلەردى قاتاڭداتقانىنا بايلانىستى بولدى. نيۋ-يورك مەرى بيلل دە بلازيونىڭ اتاپ وتۋىنشە، جەتى كۇندە قالا بويىنشا كوروناۆيرۋس تەستىلەرىنىڭ وڭ قورىتىندىنى انىقتاعان كورسەتكىشى 2,52 پايىزدى قۇرادى. ەگەر بۇل سان 3 پايىزعا جەتسە، ەل بويىنشا ەڭ ءىرى مەملەكەتتىك مەكتەپ جۇيەسى سىرتتاي وقۋ ۇلگىسىنە اۋىسادى.
وسى ارادا، قۇراما شتاتتاردا كوروناۆيرۋس جۇقتىرۋ وقيعالارى سانىنىڭ كوبەيۋى، اۋرۋحاناعا جاتقىزۋ جانە ءولىم سانىنىڭ وسىمىنە بايلانىستى ەكىنشى تولقىننىڭ كوكتەمگى ورشۋدەن كەيىن پاندەميانى باقىلاۋعا الا العان سولتۇستىك- شىعىس اۋدانداردى قامتي الاتىنىنىڭ بەلگىلەرى كوبەيگەن. Reuters تالداۋىنا سايكەس، سەيسەنبى كۇنى قۇراما شتاتتاردا 1450 ءولىم وقيعاسى تىركەلدى، بۇل تامىز ايىنان باستاپ ەڭ جوعارى كورسەتكىش بولىپ تابىلادى.
ا ق ش-تا اۋرۋ جۇقتىرۋ وقيعالارىنىڭ سانى جەتى كۇن قاتارىنان كوبەيىپ، سەيسەنبى سوڭىندا 136 مىڭ ادامعا جەتكەن، ال اۋرۋحاناعا جاتقان ادامداردىڭ سانى پاندەميا باستالعالى العاش رەت 60 مىڭ ادامنان استى.
اۆتور: زارينا تۋعانبايەۆا
