ابايدىڭ قارا سوزدەرى تاعى ءبىر ۇلتتىڭ تىلىنە اۋدارىلدى
كىتاپتى وزبەك تىلىنەن قازاق تىلىنە اقىن، اۋدارماشى، ق ر مەملەكەتتىك سىيلىعىنىڭ لاۋرەاتى نەسىپبەك ايت ۇلى اۋدارعان، دەپ حابارلايدى قازاقپارات ءتىلشىسى.
«شىعىس شايىرلارىنىڭ دارا تۇلعاسى، ەجەلگى تۇركى ادەبيەتىنىڭ اتاسى الىشەر ءناۋايدىڭ ەڭبەگىن قازاق تىلىنە اۋدارۋ - ماڭىزدى وقيعا. بۇل - قازاق ادەبيەتىنە قوسىلعان قۇندى ۇلەس. اباي ءناۋايدى ءوزىنىڭ رۋحاني ۇستازى ساناپ، ونىڭ ولەڭدەرىنەن تاعىلىم العانىن ءبارىمىز جاقسى بىلەمىز. وسى تۇرعىدان العاندا ەكى بىردەي كەمەڭگەردىڭ ەڭبەكتەرىن قاتار اۋدارۋدىڭ سيمۆوليكالىق ءمانى بار دەۋگە ابدەن بولادى. الىشەر ناۋايدىڭ «حامسا» اتتى ەڭبەگى قازاق تىلىندە جارىق كورىپ وتىر. ول - شىعىستان شىققان اقىنداردىڭ ءبىرى، ءارى بىرەگەيى. ونىڭ شىعارمالارى الەم ادەبيەتىنىڭ دامۋىنا ىقپال ەتتى. اقىننىڭ ولەڭدەرى سول كەزدىڭ وزىندە- اق دۇنيە جۇزىندەگى ەڭ ءىرى كىتاپحانالارعا قويىلعان. وسىنداي كولەمدى ەڭبەكتى قازاق تىلىنە اۋدارىپ، تۇركى دۇنيەسى ءۇشىن ماڭىزدى، زور جۇمىس ىستەگەن نەسىپبەك ايت ۇلى اعامىزعا العىسىمىزدى بىلدىرەمىز»، - دەيدى ق ر پارلامەنتى سەناتىنىڭ ءتوراعاسى ماۋلەن اشىمبايەۆ. ول حالىقارالىق تۇركى اكادەمياسىنىڭ جۇمىسىن ەرەكشە اتاپ ءوتتى.
«اكادەميا تۇركى الەمىمەن قاتار ونەردەگى اۋىزبىرشىلىكتى نىعايتۋعا زور ۇلەس قوسىپ وتىر. بۇعان دەيىن دە وسى ۇيىمنىڭ باستاماسىمەن يگى شارالار ىسكە اسىرىلدى. اتقارىلعان جۇمىستارعا مەملەكەت باسشىسى دا جوعارى باعاسىن بەرىپ كەلەدى. ءدال قازىرگى كەزەڭدە وزبەكستاننىڭ تۇركى اكادەمياسىنا قوسىلۋ جۇمىستارى جۇرگىزىلىپ جاتقانىن بىلەمىز. وزبەك ەلىنىڭ تۇركى دۇنيەسىندەگى ورنى ەرەكشە. وسىعان وراي اكادەمياعا جانە ونىڭ باسشىسى دارحان قىدىرالىگە العىسىمىزدى بىلدىرەمىز. تۇركى دۇنيەسىنىڭ تۇتاستىعىن ساقتاۋعا ارنالعان ەڭبەكتەرىڭىز تابىستى بولسىن» ، - دەدى ول. الىشەر ناۋايدىڭ اتاقتى «حامسا»، «ءلايلى- ءماجنۇن»، «ەسكەندىر قورعانى» كىتابىن كورنەكتى اقىن، ق ر مەملەكەتتىك سىيلىعىنىڭ لاۋرەاتى نەسىپبەك ايت ۇلى وزبەك تىلىنەن ءتارجىمالادى. ال دانىشپان ابايدىڭ قارا سوزدەرىن ياكۋبجان يۋلداشەۆ وزبەك تىلىنە اۋداردى.
«بۇل ءىس- شارانىڭ وتكىزىلۋى قازاقستان رەسپۋبليكاسى تۇڭعىش پرەزيدەنتى - ەلباسى نۇرسۇلتان نازاربايەۆتىڭ، مەملەكەت باسشىسى قاسىم-جومارت توقايەۆتىڭ قازاقستاندا تۇراتىن حالىقتاردىڭ ۇلتتىق مادەنيەتىن ساقتاۋ، دامىتۋ ءۇشىن بارلىق جاعدايدى جاساعاندىعىن تاعى دا راستايدى. بۇل شارا ءبىزدىڭ ويىمىزدى، ماقسات، تىلەكتەرىمىزدى بىلدىرەتىن جالپىعا ورتاق مەرەكە. وسى مۇمكىندىكتى پايدالانا وتىرىپ مەن بۇل ءىس- شارانى وسىنداي جوعارى دەڭگەيدە ۇيىمداستىرعانى ءۇشىن حالىقارالىق تۇركى اكادەمياسىنىڭ پرەزيدەنتى دارحان ءقىدىرالى مىرزاعا ەرەكشە العىسىمدى بىلدىرەمىن»، - دەدى وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سايديكرام نيازحوجايەۆ.
كىتاپتاردىڭ تۇساۋكەسەر راسىمىنە قازاقستان رەسپۋبليكاسى پارلامەنتى سەناتىنىڭ ءتوراعاسى ماۋلەن اشىمبايەۆ، وزبەكستاننىڭ وليي ءماجىلىس سەناتىنىڭ ءتورايىمى تانزيلا ناربايەۆا، حالىقارالىق تۇركى اكادەمياسىنىڭ پرەزيدەنتى دارحان قىدىرالى، تۇركيا، وزبەكستان، قىرعىزستان ەلدەرىنىڭ قازاقستانداعى ەلشىلەرى، ءماجىلىس دەپۋتاتتارى جانە ءبىرقاتار اقىن- جازۋشى مەن زيالى قاۋىم وكىلدەرى قاتىستى.
اۆتور: زارينا قاھارمان
