قانداستارعا اۋىل شارۋاشىلىعى ماقساتىندا جەر بەرىلەدى

نۇر- سۇلتان. قازاقپارات - قانداستارعا شارۋا نەمەسە فەرمەر قوجالىعىن جۇرگىزۋ ءۇشىن ۋاقىتشا جەر تەلىمدەرى بەرىلەدى.

«قازاقستان رەسپۋبليكاسىنىڭ جەر كودەكسىنە سايكەس، قانداستارعا شارۋا نەمەسە فەرمەر قوجالىعىن جۇرگىزۋ ءۇشىن ۋاقىتشا جەر پايدالانۋ (جالعا الۋ) قۇقىعى 10 جىلعا دەيىنگى مەرزىمگە بەرىلەدى. بۇل رەتتە شارۋا نەمەسە فەرمەر قوجالىعىن جانە اۋىل شارۋاشىلىعى ءوندىرىسىن جۇرگىزۋ ءۇشىن قانداستارعا ۋاقىتشا جەر ۋچاسكەلەرىن بەرۋ اۋىل شارۋاشىلىعى ماقساتىنداعى جەردەن، ارنايى جەر قورىنان، يمميگراتسيالىق جەر قورىنان جانە بوس جەرلەردەن جۇزەگە اسىرىلادى»، - دەپ ءتۇسىندىردى گ. بيمەندينا «وتانداستار قورى» ك ە ا ق جانىنداعى قوعامدىق كوميسسيانىڭ وتىرىسىندا. سونداي- اق، قانداستاردىڭ شارۋا نەمەسە فەرمەر قوجالىعىن نەمەسە اۋىل شارۋاشىلىعى وندىرىسىنە بايلانىستى وزگە دە قىزمەتتى جۇرگىزۋ ءۇشىن ارنايى جەر قورىنان ۋچاسكە الۋعا ءبىرىنشى كەزەكتە قۇقىعى بار. بۇل جەر كودەكسىنىڭ 46-بابىندا قاراستىرىلعان.

«بۇل تالاپتاردى قانداستار قازاقستان رەسپۋبليكاسىنىڭ ازاماتتىعىن العانشا پايدالانا الادى. سونىمەن بىرگە، قازاقستان رەسپۋبليكاسى جەر بالانسىنىڭ دەرەكتەرىنە سايكەس 2019 -جىلعى 1-قاراشادا 95,7 مىڭ گەكتار بوس جەر تىركەلگەن، ونىڭ ىشىندە اۋىل شارۋاشىلىعى القاپتارى 78,3 مىڭ گەكتار (ەگىستىك - 51,7 گەكتار، جايىلىم - 74,1 مىڭ گەكتار، شابىندىق - 2,1 مىڭ گەكتار، تىڭايعان جەرلەر - 2 مىڭ گەكتار). ال ارنايى جەر قورى 37,5 مىڭ گەكتاردى قۇرايدى. بارلىق اقپارات جەر كوميتەتىنىڭ سايتىندا جانە جەرگىلىكتى اتقارۋشى ورگانداردىڭ سايتىندا كورسەتىلگەن»، - دەدى گۇلجاھان بيمەندينا.