اباي شىعارمالارى العاش رەت جاپون تىلىنە اۋدارىلدى

توكيو. قازاقپارات- جاپونيادا قازاق اقىنى جانە اعارتۋشىسى اباي قۇنانباي ۇلىنىڭ جاپون تىلىنە اۋدارىلعان العاشقى شىعارمالار جيناعىنىڭ تۇساۋكەسەرى ءوتتى.

شاراعا ەلدىڭ ساياسي، مادەني جانە قوعامدىق توپتارىنىڭ، سونداي- اق ديپلوماتيالىق كورپۋستىڭ وكىلدەرى قاتىستى، دەپ حابارلايدى قازاقپارات ءتىلشىسى.

ق ر سىرتقى ىستەر مينيسترلىگىنەن ءمالىم ەتكەندەي، جاپونيا پارلامەنتىنىڭ جوعارعى پالاتاسىنىڭ سپيكەرى اكيكو سانتو ءىس-شارانىڭ باستى قوناعى بولدى. ونىڭ ايتۋىنشا، ابايدىڭ فيلوسوفياسى ادامزاتتىڭ قازىرگى كەزەڭدەگى بارلىق قيىنشىلىقتاردى، سونىڭ ىشىندە كوروناۆيرۋس پاندەمياسىن ەڭسەرۋ ءۇشىن قاجەتتى دانالىق پەن باتىلدىققا ۇيرەتەدى. ەلشى ەرلان باۋداربەك- قوجاتايەۆ بيىل ابايدىڭ 175 جىلدىعى اياسىندا بۇكىل الەم بويىنشا وتكىزىلىپ جاتقان ءىس- شارالار قازاقستاننىڭ مادەني ديپلوماتياسىنىڭ دامۋىنا ەرەكشە ۇلەس قوسىپ جاتقانىن ايتتى.

جاپونيا مادەنيەت جونىندەگى اگەنتتىگىنىڭ ءتوراعاسى رەحەي مياتا ءوز سوزىندە اباي ولەڭدەرىنىڭ جانە «مانەشيۋ» جاپون ولەڭدەرىنىڭ كونە جيناعىنىڭ جالپى مازمۇنى ۇقساس بولعانىنا ءتانتى بولعانىن اتاپ ءوتىپ، ەكى ەل ەجەلدەن جىبەك جولى ارقىلى بايلانىسقانىن جەتكىزدى. كىتاپتىڭ تۇساۋكەسەرىن كۇن شىعىس ەلىندە زاماناۋي جاپون پوەزياسىنىڭ «قوزعاۋشى كۇشى» دەپ اتالىپ جۇرگەن اتاقتى اقىن جانە سىنشى كيۆاو نومۋرا جاسادى. كورەرمەندەر ءانشى رانكانىڭ ابايدىڭ «كوزىمنىڭ قاراسى» ءانىن جاپون تىلىندە ورىنداۋىن ىستىق ىقىلاسپەن قارسى الدى.

جالپى العاندا، ابايدىڭ مەرەيتويى اياسىندا توكيوداعى قازاقستان ەلشىلىگى بيىل ءبىرقاتار ءىس- شارا ۇيىمداستىردى.

اتاپ ايتقاندا، اباي شىعارمالارىن مانەرلەپ وقۋ ەستافەتاسىنا جاپونيا پارلامەنتىنىڭ دەپۋتاتى جانە قازاقستانمەن پارلامەنتتىك دوستىق ليگاسىنىڭ ءتوراعاسى تاكەو كاۆامۋرا قاتىسىپ، ق ر پارلامەنتىنىڭ سەناتورى مۇحتار قۇل-مۇحاممەدتىڭ چەللەندجىنە جاۋاپ رەتىندە جاپون تىلىندە «قارا سوزدەن» ءۇزىندى وقىدى.

سونىمەن قاتار، «Abai World Challenge « حالىقارالىق ۆيدەومارافونىندا جاپونيا اقىندار قاۋىمداستىعىنىڭ پرەزيدەنتى يامادا تاكااكي ابايدىڭ كوكتەمگە ارنالعان ولەڭدەرىنىڭ جاپونشا اۋدارماسىن ۇسىندى. توكيو ورتالىق كىتاپحاناسىندا اباي قۇنانباي ۇلىنىڭ 175 جىلدىعىنا ارنالعان كىتاپ جانە يلليۋستراتسيالار كورمەسى ءوتتى. كىتاپ شىعارۋ جوباسىن ق ر مادەنيەت جانە سپورت مينيسترلىگىنىڭ تاپسىرىسى بويىنشا قازاقستاننىڭ جاپونياداعى ەلشىلىگىنىڭ قولداۋىمەن «ۇلتتىق اۋدارما بيۋروسى» قوعامدىق قورى جۇزەگە اسىردى.

ماتىندەردىڭ ادەبي اۋدارماسىن توكيو شەت تىلدەر ۋنيۆەرسيتەتىنىڭ پروفەسسورى حيروكي ساكاي، قازاق ادەبيەتىن زەرتتەۋشى ميكيا نيشيمۋرا، جاپون- قازاق سوزدىگىنىڭ اۋدارماشىسى جانە قۇراستىرۋشىسى شيگەنوبۋ ماسۋدجيما ورىندادى. اباي قۇنانباي ۇلىنىڭ جاپون تىلىندەگى كىتابى اتالمىش ەلدىڭ كىتاپحانالارى مەن وقۋ ورىندارىنا تاراتىلادى.

اۆتور: بالنۇر قوجاگەلدى