دارحان قىدىرالى: ابايدىڭ جىلى ءوزى ناسيحاتتاعانداي داڭعازادان ادا بولىپ وتۋدە

نۇر- سۇلتان. قازاقپارات - اباي كەزىندە اكەسى قۇنانبايدىڭ اسىن وتكىزبەي، وعان جۇمسالاتىن شىعىندى جاس شاكىرتتەرگە شاكىرتاقى رەتىندە، كەدەي-كەپشىك، مۇقتاج جاندارعا تاراتىپ بەرگەن.

بۇل تۋرالى «اباي جانە ادامزاتتىق گۋمانيزم» اتتى حالىقارالىق فورۋمدا حالىقارالىق تۇركى اكادەمياسىنىڭ پرەزيدەنتى دارحان قىدىرالى ايتتى، دەپ حابارلايدى قازاقپاارات ءتىلشىسى.

«يۋنەسكو دەڭگەيىندە اتالىپ ءوتىپ جاتقان ابايدىڭ 175 جىلدىعى بيىل ەلىمى ەلىمىزدە دە، شەتەلدە دە اتاپ ءوتىلدى. كونفەرەنسيالار، باسقوسۋلار، جيىندار وتۋدە. ءبىزدىڭ ماڭدايالدى وقۋ ورنىنىڭ ءبىرى - نازاربايەۆ ۋنيۆەرسيتەتىنىڭ وسىنداي يگى شاراعا ۇيىتقى بولىپ وتىرعانى قۋانتادى. جىل باسىندا ق ر پرەزيدەنتى قاسىم-جومارت كەمەل ۇلى ارنايى كوميسسيا قۇرىپ، جارلىق شىعاردى. ەل گازەتى «ەگەمەن قازاقستاندا» پرەزيدەنتىمىزدىڭ كولەمدى ماقالاسى جارىق كوردى. جالپى «ەگەمەن قازاقستاندا» جىلدىڭ باسىنان بەرى كۇن سايىن اباي، ءال-فارابيگە قاتىستى ماقالالار جارىق كورىپ كەلەدى. سولاردىڭ اراسىندا بۇگىنگى جيىنعا قاتىسىپ وتىرعان وزدەرىڭىزدىڭ دە ماقالالارىڭىز بار. ەلىمىزدىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ ۇلكەن ماقالاسى جارىق كوردى.

«ابايدى ۇعىنۋ - ءبىر بولەك، ابايمەن توعىسۋ، ونىمەن ىشتەي ۇعىسۋ، ونىڭ تەرەڭ الەمىنە سۇڭگىپ، ءوزىڭنىڭ بولمىسىڭا ءسىڭىرۋ - بۇل قاتپارى قالىڭ قۇبىلىس» دەپ ەلباسى اتاپ كورسەتكەندەي، اباي الەمىمەن ۇندەسۋ - بيىلعى جىلدىڭ ۇلكەن مىندەتى دەپ ويلايمىن»، - دەيدى حالىقارالىق تۇركى اكادەمياسىنىڭ پرەزيدەنتى، «ەگەمەن قازاقستان» گازەتىنىڭ باسقارما ءتوراعاسى دارحان قىدىرالى.

ول ەلباسىنىڭ باستاماسىمەن قۇرىلعان حالىقارالىق تۇركى اكادەمياسى بيىلعى جىلدى تۇركى الەمىندە اباي جىلى دەپ جاريالاعانىن ايتتى.

«جىلدىڭ باسىندا باكۋدە ۇلكەن ءىس-شارا وتكىزدىك. يۋنەسكو-دا ۇلكەن شارا وتكىزۋدى جوسپارلاعان بولاتىنبىز، ءبىراق كوروناۆيرۋس ىندەتىنە بايلانىستى ول كەيىنگە شەگەرىلدى. ءبىراق ءبىز يۋنەسكو باسشىلارىنىڭ، حالىقارالىق ۇيىمدار جەتەكشىلەرىنىڭ جانە بەلگىلى اباي تانۋشىلاردىڭ قاتىسۋىمەن ونلاين شارا وتكىزدىك. حالىقارالىق تۇركى اكادەمياسى ابايعا قاتىستى وننان استام جيىن وتكىزىپ، 9 كىتاپ شىعاردى. ابايدىڭ قارا سوزدەرى ءازىربايجان، تۇرىك، وزبەك تىلدەرىنە اۋدارىلدى. ابايدىڭ اكادەميالىق جيناعى تۇركيا مەن قىرعىزستاندا جارىق كوردى. اباي تانۋشىلاردىڭ ۇلكەن جيناعى تۇركيادا جاريالاندى. سونىمەن قاتار، «اباي جولى» رومان- ەپوپياسىن تۇركيادا باسىپ شىعاردىق. ابايدىڭ ولەڭدەر جيناعى مەن پوەمالارى، قارا سوزدەرى كوپتەگەن تىلگە اۋدارىلىپ، تۇساۋكەسەر ءراسىمى ءوتتى. وسى شارالارعا ۇيىتقى بولعان ءبىزدىڭ عالىمدارىمىزدى، سەپتەسكەن ەلشىلەردى قۇتتىقتاپ، راحمەت ايتامىن»، - دەدى ول.

سونداي-اق، ول ابايدىڭ جىلى دا ءوزى ناسيحاتتاعانداي داڭعازادان ادا، سونداي قاراپايىم جانە تويعا ەمەس، ويعا نەگىزدەلىپ ءوتىپ جاتقانىن ايتتى.

«ابايدىڭ ءوزى دە كەزىندە اكەسى قۇنانبايدىڭ اسىن وتكىزبەي، وعان جۇمسالاتىن شىعىندى جاس شاكىرتتەرگە شاكىرتاقى رەتىندە، كەدەي-كەپشىك، مۇقتاج جاندارعا تاراتىپ بەرگەنى بەلگىلى. اباي تاعىلىمى سونىسىمەن قۇندى ابايدىڭ اماناتىنا ادال بولۋ، ونىڭ ايتقان وسيەتىنە، اسىل ىسىنە ۇمتىلۋىمىز باستى ماسەلە عوي دەپ ويلايمىن»، - دەيدى دارحان قىدىرالى.

قازاق حالقىنىڭ ۇلى اقىنى اباي قۇنانباي ۇلىنىڭ 175 جىلدىق مەرەيتويىنا ارنالعان فورۋم نازاربايەۆ ۋنيۆەرسيتەتىننىڭ رۋحاني جاڭعىرۋ مادەني ورتالىعى مەن نازاربايەۆ ۋنيۆەرسيتەتىنىڭ قازاق ءتىلى جانە تۇركى تانۋ كافەدراسىنىڭ ۇيىمداستىرۋىمەن ءوتتى.

اۆتور: زارينا قاھارمان