انتاليادا اباي ساياباعى اشىلدى
ابايدىڭ 175 جىلدىق مەرەيتويىن مەرەكەلەۋ شەڭبەرىندە قازاقستان تۇركياداعى ەلشىلىگى، انتالياداعى كونسۋلدىعى، قازاقستان جانە ەۋرازيا حالىقتارىنىڭ دوستىق پەن مادەنيەت قاۋىمداستىعىنىڭ باستاماسىمەن انتاليا قالاسىندا ورنالاسقان ساياباققا اباي قۇنانباي ۇلى ەسىمى بەرىلگەن بولاتىن.
ساياباقتا ابايدىڭ مارمەرمەن قاپتالعان ەسكەرتكىش تاقتاسى ورناتىلىپ، اشىلۋ سالتاناتىنا قازاقستاننىڭ تۇركياداعى ەلشىسى ابزال ساپاربەك ۇلى، انتاليا قالاسى مۇراتپاشا اۋدانىنىڭ مەرى ءۇمىت ۋيسال، دۇنيەجۇزى قازاقتار اسسوتسياتسياسى ءبىرىنشى ورىنباسارىنىڭ كەڭەسشىسى قارلىعاش قوجامۇراتوۆا، قوجا احمەت ياسساۋي ۋنيۆەرسيتەتى وكىلەتتى كەڭەسىنىڭ ءتوراعا كەڭەسشىسى، پروفەسسور فىرات پۋرتاش، رەسپۋبليكالىق حالىق پارتياسىنىڭ انتالياداعى ءتوراعاسى نۋسرەت بايار جانە ورىنباسارى رافەت زەيبەك، قازاقستان جانە ەۋرازيا حالىقتارىنىڭ دوستىق پەن مادەنيەت قاۋىمداستىعى مۇشەلەرى، جەرگىلىكتى قوناقتار مەن ب ا ق وكىلدەرى قاتىستى.
القالى جيىن بارىسىندا شاعىن كونسەرتتىك باعدارلاما ۇيىمداستىرىلىپ، اباي شىعارماشىلىعىنان بەلگىلى ولەندەرى وقىلىپ، ءان-كۇيى شىرقالىپ، كىتاپتارى سىيعا تارتىلدى. ەلشى ابزال ساپاربەك ۇلى ءوزىنىڭ بەتاشار سوزىندە، ابايدىڭ 175 جىلدىق مەرەيتويىنا ارنالعان بۇل ساياباقتىڭ اشىلۋىنا قولداۋ كورسەتكەن باۋىرلاس تۇركيا ەلىنە ءوز العىسىن بىلدىرە وتىرىپ، وسىنداي حالىقارالىق دەڭگەيدە اتقارىلعان شارالار ەكى ەل اراسىنداعى بايلانىستىڭ ودان ءارى جاقىنداي تۇسۋىنە ءوز سەپتىگىن تيگىزەتىنىنە سەنىم ءبىلدىردى.
«تۇركى الەمىنىڭ ۇلى پەرزەنتى اباي، قازاق حالقىنىڭ تەمىرقازىعى»، - دەگەن ا. ساپاربەك ۇلى، تۇركى كەڭەسىنىڭ قۇرمەتتى ءتوراعاسى، ەلباسىمىز نۇرسۇلتان نازاربايەۆتىڭ: «اباي ءوزىنىڭ تۋعان حالقىمەن ماڭگى-باقي بىرگە جاسايدى، عاسىرلار بويى قازاق ەلىن، قازاعىن بيىكتەرگە، اسقار اسۋلارعا شاقىرا بەرەدى»، - دەگەن ونەگەلى ءسوزىن ەسكە سالدى.
ۇلى اقىن مۇراسىنىڭ باۋىرلاس ەلدە ەرەكشە دارىپتەلىپ جاتقانىنا ريزاشىلىعىن بىلدىرگەن ا. ساپاربەك ۇلى، قازاقستان پرەزيدەنتى قاسىم-جومارت توقايەۆتىڭ وسى جىلى جارىق كورگەن ماقالاسىنداعى «قازىر ايتىپ جۇرگەن ينتەللەكتۋالدى ۇلت قالىپتاستىرۋ يدەياسى ابايدان باستاۋ الدى دەۋگە بولادى. ۇلى ويشىل ءار سوزىمەن ۇلتتىڭ ورەسىن ءوسىرۋدى كوزدەدى»، - دەگەن سوزدەرىنە نازار اۋدارا وتىرىپ، اباي جولىمەن جۇرگەن جاستاردىڭ، حالقىمىزدىڭ جانە جالپى ادامزاتتىڭ وركەندەۋى جولىندا ولشەۋسىز ۇلەس قوساتىندىعىنا توقتالدى.
سونىمەن قاتار اشىلۋ سالتاناتىندا ءسوز سويلەگەن انتاليا، مۇراتپاشا اۋدانىنىڭ ءمەرى ءۇمىت ۋيسال، ساياباققا اباي ەسىمىن بەرۋ قازاق جانە تۇرىك حالىقتارىنىڭ رۋحاني ءارى مادەني جاقىندىعىن كورسەتكەن ماڭىزدى ءىس-شارا ەكەنىن اتاپ ءوتتى.
«اباي ەسىمى تۇرىك الەمىن بىرلىكتە ۇستايتىن ۇلى ەسىمدەردىڭ ءبىرى» ەكەنىن ايتا وتىرىپ، ەكى ەل اراسىنداعى بىرلىك بەن ىنتىماقتاستىققا وزىندىك ۇلەس قوساتىنىن جەتكىزدى.
