اباي شىعارمالارىنىڭ اكادەميالىق تولىق جيناعى جارىققا شىعادى

نۇر-سۇلتان. قازاقپارات - تاياۋ ارادا اباي شىعارمالارىنىڭ اكادەميالىق تولىق جيناعى جارىققا شىعادى. بۇل تۋرالى م. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ ءمالىم ەتتى، دەپ حابارلايدى قازاقپارات ءتىلشىسى.

«بيىل ينستيتۋت ءوزىنىڭ 3 جىلدىق جوبالارىن اياقتايدى. 12 مونوگرافيانىڭ ىشىندە قازاق ادەبيەتىنىڭ ىرگەلى ماسەلەلەرىنە، قازاق فولكلورىنا، قازىرگى قازاق ادەبيەتىنىڭ دامۋ ورىسىنە قاتىستى جاڭا ەڭبەكتەر جارىق كورەدى. سونىمەن قوسا ءبىزدىڭ وقۋ ورداسى ونەر ينستيتۋتى اتالعاندىقتان قازاق ونەرىنىڭ ءارتۇرلى سالالارى بويىنشا ىرگەلى زەرتتەۋلەر جارىق كورەدى. قازاق مۋزىكاسى، تەاترى، كينوونەرى جانە بەينەلەۋ ونەرىنىڭ ماسەلەلەرى جونىندە جاڭا ەڭبەكتەر وقىرمانعا جول تارتادى»، - دەدى كەنجەحان ماتىجانوۆ ءبىلىم جانە عىلىم مينيسترلىگىنىڭ اپپارات جيىنىندا.

ينستيتۋت باسشىسىنىڭ ايتۋىنشا، 2019 -جىلى «دالا فولكلورى» انتولوگياسىنىڭ بەس تومى شىققان.

ودان بولەك، «ۇلى دالانىڭ كونە سارىندارى» انتولوگياسىنىڭ ءبىر تومى، «ەجەلگى ءداۋىر ادەبيەتى» انتولوگياسىنىڭ ءبىر تومى زامانعا ساي سيفرلىق- ەلەكتروندى فورماتتا وڭ مىڭ دانامەن كىتاپحانالارعا تاراتىلعان.

«بۇل - بۇرىن-سوڭدى مۇنداي فورماتتا جارىق كورمەگەن جيناقتار. اسىرەسە مۇنىڭ ەلەكتروندى جانە اۋديونۇسقاسى قازىرگى وقىرمانداردى ەرەكشە قىزىقتىرىپ وتىر. سونىمەن قاتار بيىل ۇلى ابايدىڭ 175 -جىلدىق مەرەيتويىنا تارتۋ رەتىندە اقىن شىعارمالارىنىڭ اكادەميالىق تولىق جيناعى جارىق كورەدى. قازىر باسپادا تۇر. بۇگىن-ەرتەڭ قولىمىزعا تيەدى دەپ ەسەپتەپ وتىرمىز. بۇل - شيرەك عاسىردان كەيىن قايتادان جارىق كورىپ وتىرعان ەڭ تولىق جيناعى سانالادى. ول - اكادەميالىق عىلىمي جيناق»، - دەدى ول.

ەسكە سالا كەتسەك، وسى وتىرىستا ءبىلىم جانە عىلىم ءمينيسترى اسحات ايماعامبەتوۆ م. اۋەزوۆ اتىنداعى ادەبيەت جانە ونەر ينستيتۋتىنىڭ بارلىق جادىگەرى مەن قۇجاتىن سيفرلاندىرۋدى تاپسىرعان بولاتىن.