رۋمىن ەلىندە ابايدىڭ ءمۇسىنى سالتاناتتى تۇردە اشىلدى
جيىنعا رۋمىنياداعى قازاقستان ەلشىلىگى مەن ەلباسى نەگىزىن قالاعان ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى مۇرىندىق بولىپ، قولداۋ كورسەتتى.
ءمۇسىن اۆتورى - ەۋرازيا ۇلتتىق ۋنيۆەرسيتەتىنىڭ پروفەسسورى، كورنەكتى ءمۇسىنشى، ق ر سۋرەتشىلەر وداعى جانە قازاقستان ديزاينەرلەر وداعىنىڭ مۇشەسى تالعات اناربەكوۆ.
ونىڭ اۆتورلىق جۇمىستارى ءوز ەلىمىز بەن شەت ەلدەردەگى كورمەلەرگە قويىلعان. ءىس-شاراعا پارلامەنت جانە مەملەكەتتىك ورگانداردان كەلگەن رۋمىندىق ساياسي قايراتكەرلەر، شەت مەملەكەتتەردىڭ ەلشىلەرى، سونداي-اق اكادەميالىق، قوعامدىق جانە ورتا بيزنەس پەن ب ا ق وكىلدەرى قاتىستى. ەلشى نۇرباح رۇستەموۆ ءوزىنىڭ قۇتتىقتاۋ سوزىندە ابايدىڭ 175 جىلدىعى اياسىندا ەسكەرتكىشتىڭ اشىلۋى قازاقستان مەن رۋمىنيا حالىقتارىنىڭ ءوزارا سىيلاستىعىنىڭ، ەكى ەلدىڭ تاريحىن تاني وتىرىپ، جاڭا ۇرپاقتى تاربيەلەۋدىڭ كورنەكى ۇلگىسى بولىپ تابىلاتىنىن اتاپ ءوتتى.
سونىمەن قاتار ەۋروپالىق مادەنيەتكە تارتۋ قازاق مادەنيەتىنىڭ رەفورماتورى - اباي ۇمتىلىسىنىڭ ءبىرى ەكەندىگى جانە ونىڭ ۇلى مۇراسى شىعىس پەن باتىس مادەنيەتىنە بىردەي ورتاق دۇنيە ەكەنى ەگجەي- تەگجەيلى ايتىلدى. شارا بارىسىندا قازاقتىڭ ۇلى اقىنى رۋمىنيا جاستارىنا باعا جەتپەس قۇندىلىق ەكەنى ەرەكشە اتالىپ، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى مەن بۋحارەست قالاسىنىڭ مەرىنە العىس ءبىلدىرىلدى.
ءىس-شاراعا قاتىسۋشىلار قازاق حالقىنىڭ كەمەڭگەر اقىنىن حالىقتار اراسىنداعى دوستىقتىڭ ومىرشەڭ بەلگىسى دەپ باعالادى. ماسەلەن، پارلامەنت دەپۋتاتتارى پالاتاسىنىڭ ۆيتسە-سپيكەرى، «قازاقستان- رۋمىنيا» پارلامەنتارالىق دوستىق توبىنىڭ ءتوراعاسى فلورين يورداكە مەن مادەنيەت مينيسترلىگىنىڭ مەملەكەتتىك حاتشىسى ميحاي فيريكا الەمدىك دەڭگەيدەگى ۇلى اقىنعا ەسكەرتكىش ورناتۋ بۋحارەستىڭ ومىرىندەگى جاڭا تاريحي كەزەڭگە اينالاتىنىن، سونداي-اق ونىڭ الەمدىك مادەنيەتكە قوسقان ۇلەسى ءۇشىن قازاقستان حالقىنا قۇرمەت بولىپ تابىلاتىنىن جەتكىزدى.
شارا بارىسىندا ابايدىڭ «قارا سوزدەرىن» رۋمىن تىلىنە اۋدارعان بەلگىلى لينگۆيست انتوانەتا ولتيانۋ اقىننىڭ ءومىرى مەن شىعارماشىلىعى تۋرالى ايتىپ بەرسە، بالاباقشا تاربيەلەنۋشىلەرى قازاق ءتىلى مۇعالىمىنىڭ جەتەكشىلىگىمەن اباي ولەڭدەرىن جاتقا وقىپ، اندەرىن شىرقادى.
ءىس-شارانىڭ ءماندى دە مازمۇندى وتۋىنە رۋمىنيادا تۇراتىن جاس قازاقستاندىق سۋرەتشى الۋا تەبەنوۆانىڭ ەكسپوزيتسياسى دا ۇلكەن ۇلەس قوستى، ول ءوز كارتينالارىندا قازاق حالقىنىڭ ۇلتتىق بىرەگەيلىگىنىڭ ءمانىن جەتكىزەدى. سونداي-اق، قوناقتار نازارىنا رۋمىن تىلىنە اۋدارىلعان ابايدىڭ «قارا سوزدەر»، ەلباسىنىڭ «تاۋەلسىزدىك ءداۋىرى» كىتابى جانە ق ر پرەزيدەنتى ق. توقايەۆتىڭ بيىلعى 1- قىركۇيەكتەگى جولداۋى، تاعى باسقا دا يميدجدىك ماتەريالدار ۇسىنىلدى.
ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى، اكادەميك ەرلان سىدىقوۆ بۋحارەست تورىندە اسقاقتاعان اباي ءمۇسىنىن ق ر تۇڭعىش پرەزيدەنتى ن. ءا. نازاربايەۆتىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» جانە ق ر پرەزيدەنتى ق. ك. توقايەۆتىڭ «اباي جانە 21-عاسىرداعى قازاقستان» ەڭبەكتەرىنىڭ كونتسەپتسيالىق مۇراتىن، اقىننىڭ 175 جىلدىق مەرەيتويىن وتكىزۋ جونىندەگى مەملەكەتتىك ءىس-شارالاردى جۇزەگە اسىرۋدىڭ ءبىر كورىنىسى دەپ بىلەدى.
ورايى كەلگەندە ايتا كەتكەن ءجون، قازاقستان مەن رۋمىنيا اراسىندا ديپلوماتيالىق قارىم-قاتىناس وسىدان 28 جىل بۇرىن قالانعان. سول كەزدەن باستاپ ەكىجاقتى ساياسي، ەكونوميكالىق جانە مادەني-گۋمانيتارلىق سالاداعى ىنتىماقتاستىق ورايلى دامىپ كەلەدى.
رۋمىنيا - قازاقستاننىڭ وڭتۇستىك- شىعىس ەۋروپاداعى ماڭىزدى ساۋدا سەرىكتەسى. سوڭعى ءتورت جىلدا رۋمىنيا جاراتىلىستانۋ جانە گۋمانيتارلىق عىلىمدار، عىلىمي-تەحنيكالىق ماماندىقتار بويىنشا قازاقستاندىق ءبىلىم الۋشىلارعا گرانت ۇسىنۋدا.
