تاكسيست الەۋمەتتىك فيلمدەر تۇسىرەدى – س ق و

پەتروپاۆل. قازاقپارات - سولتۇستىك قازاقستان وبلىسىندا تاكسي جۇرگىزۋشىسى قىسقا مەتراجدى الەۋمەتتىك فيلمدەر ءتۇسىرىپ، ەكى كارتينا دا الەۋمەتتىك جەلىدە كورەرمەندەردىڭ جاقسى باعاسىن الدى، دەپ حابارلايدى قازاقپارات ءتىلشىسى.

«ستاتۋس وتسا» دەپ اتالاتىن بۇل فيلم - دامير ماكيمكەنوۆتىڭ ەكىنشى جۇمىسى. قىسقا مەتراجدى فيلم 11 مينۋتقا شاقتالعان. 4 كەيىپكەر بار: ولار اكەسى، اناسى، قىزى جانە جىگىت. سەناري بويىنشا جىگىت باي وتباسىنان شىققان، تاربيەسى ناشار. قاراپايىم ماماندىق يەلەرىن، قارا جۇمىسشىلاردى مەنسىنبەيدى.

«ستاتۋس وتسا» فيلمىندە وقيعا جەلىسى ويدان الىنعانىمەن، مۇنداي جاعدايلار ومىردە، وكىنىشكە وراي كەزدەسىپ تۇرادى. بايلاردىڭ نەمەسە لاۋازىمدى ادامداردىڭ ءوزىن باسقالاردان جوعارى ۇستاۋى، مەنسىنبەۋى. مەنىڭ ماقساتىم وسىنداي ادامدارعا وي سالىپ، ولاردى وزدەرىنە سىرتتارىنان كورسەتۋ ەدى. ءومىر الما- كەزەك ەكەنىن ۇمىتپاعانىمىز ءجون»، - دەيدى دامير ماكيمكەنوۆ.

الەۋمەتتىك فيلمنىڭ اۆتورى دا، رەجيسسەرى دە داميردىڭ ءوزى. كاسىبي ءبىلىمى جوق. تاكسي جۇرگىزۋشىسى بولىپ جۇمىس ىستەيدى. فيلم ءتۇسىرۋ - داميردىڭ حوببيى.

«ينتەرنەتتەن ەلىمىزدىڭ باسقا قالالارىندا تۇسىرىلگەن قىسقا مەتراجدى فيلمدەردى قىزىعا قاراپ ءجۇردىم. كەيىن نەگە ماعان دا وسىنداي ءبىر فيلم ءتۇسىرىپ كورمەسكە دەگەن وي كەلدى. وتىرىپ، سەناري جازىپ شىقتىم. تۋعان- تۋىسىما كورسەتىپ ەدىم - ۇناتتى. تاعى بىرنەشەۋىن جازىپ، قولداۋ تاپتىم. كەيىن وپەراتور ماكسيم گلوتكوۆپەن تانىستىم، ول جۇمىس ىستەۋگە كەلىستى» ، - دەيدى اۋەسقوي رەجيسسەر. ايتۋىنشا، ارنايى وقۋىن وقىماسا دا، بۇل ءفيلمدى ءتۇسىرۋ قيىنعا سوقپاعان.

«سەناريدى جازىسىمەن ۇيدەگىلەرگە، دوستارىما كورسەتىپ، پىكىرلەرىن ءبىلدىم. ورىس- دراما تەاترىنىڭ مىقتى رەجيسسەرى بار ۆيكتور شالايەۆ دەگەن، سول كىسىگە كورسەتەمىن. قاراعاندىدا تورەبەك ورىن دەگەن رەجيسسەر بار. ول كىسى «گونكي»، «ەگو» فيلمدەرىن تۇسىرگەن. ونىمەن الەۋمەتتىك جەلى ارقىلى تانىستىق. سولارعا كورسەتىپ، اقىل- كەڭەستەرىن الامىن»، - دەيدى دامير. سەناريدى ول 4 كۇننىڭ ىشىندە تولىق جازىپ شىققان. ال فيلمدى ءبىر كۇننىڭ ىشىندە، تاڭەرتەڭنەن كەشكە دەيىن تۇسىرگەن.

«اكتەرلەردى ونلاين كاستينگ وتكىزىپ، تاڭداپ الدىم. جۇرت الەۋمەتتىك جەلى، ءتۇرلى مەسسەندجەرلەر ارقىلى فوتولارىن جىبەردى. سونداي-اق ن. پوگودين اتىنداعى وبلىستىق ورىس- دراما تەاترىنىڭ ديرەكتورى سپارتاك رامازانوۆ ماعان باستى رولدەرگە اكتەرلەردى ىرىكتەپ الۋعا كومەكتەستى. اكەنىڭ ءرولىن قۋىرشاق تەاترىنىڭ ساحناگەرى ساپار ماپەنوۆ سومدادى. انانىڭ رولىنايگۇل كەنجەعوزينا- حاسەنوۆا ويناپ شىقتى. اكتەرلەر دە مەنىڭ ويىمدى بىردەن ءتۇسىنىپ، تەز ءتىل تابىستىق»، - دەيدى فيلم اۆتورى. قىسقا مەتراجدى فيلم بەسكول اۋىلى مەن پەتروپاۆلدىڭ ىقشاماۋداندارىندا تۇسىرىلگەن.

«كينونى جارىققا شىعارۋعا ءبىر تيىن قاراجات جۇمسالمادى. وعان باستى سەبەپ - فيلمدە وزەكتى ماسەلەنىڭ قوزعالۋى دەپ بىلەمىن. يدەياسى ۇناعاندىقتان اكتەرلەر دە قاراجات سۇرامادى. كەيىن الەۋمەتتىك جەلىلەرگە، توپتارعا ورنالاستىرۋدا دا قيىندىق كورگەن جوقپىن. العاشقى فيلمىم - «دەدۋشكا» دا كورەرمەندەردىڭ جاقسى باعاسىن الدى. مۇنىمەن توقتاپ قالمايمىن. قازىر ەكى سەناري جازىپ جاتىرمىن. ونىڭ بىرەۋى - «دەدۋشكانىڭ» جالعاسى.

ەكىنشىسى كوپكە ۇلگى بولارلىق جىگىت تۋرالى. تاجىريبە جيناعاننان كەيىن تولىق مەتراجدى فيلم ءتۇسىرۋ جوسپارىمدا بار. مەن قاراپايىم وتباسىدان شىققانمىن. انام - ءۇي شارۋاسىنداعى ايەل، اكەم - تراكتوريست. سول سەبەپتى دە شىعار، قاراپايىم ادامداردىڭ ءومىرىن كورسەتەمىن. ءالى دە الەۋمەتتىك كينولار ءتۇسىرۋ جوسپاردا بار. ءبىراق جانردى وزگەرتپەكپىن. قىزىقتى وقيعالاردى نەگىزگە الىپ، سول جايىندا ەكرانعا شىعارىپ كورگىم كەلەدى»، - دەيدى دامير ماكيمكەنوۆ.